7 წლის სირიელი გოგონა, ბანა ალაბედი, რომელიც მსოფლიომ თანამედროვე ანა ფრანკად გაიცნო, ალეპოდან ევაკუირებულია. ამის შესახებ არასამთავრობო ორგანიზაცია სირიელ-ამერიკელ მედიკოსთა კავშირი იტყობინება, რომლის პრეზიდენტიც თვითერზე ბანას ფოტოს აქვეყნებს.

კვირას საღამოს ქალაქიდან 350-მდე ადამიანი გაიყვანეს, მათ შორის იყო ბანაც.

უკვე რამდენიმე თვეა სირიელი ბანა ალაბედი და მისი დედა მსოფლიოს ალეპოში მიმდინარე მოვლენებზე თვითერის მეშვეობით უყვებიან. ბანა თვითერზე ინგლისურენოვან პოსტებს დედის დახმარებით პოსტავს, რომელიც მასწავლებელია.

7 წლის ბანა ანა ფრანკს დასავლურმა მედიამ თანამედროვეობის ანა ფრანკი უწოდა, იმ განსხვავებით, რომ ბანა მიმდინარე ომს რეალობაში გადმოგვცემს.

5 დეკემბერს ბანამ თვითერზე დაპოსტვა შეწყვიტა, თუმცა მოგვიანებით გაირკვა, რომ მის სიცოცხლეს საფრთხე არ ემუქრებოდა.

ბოლოს რამდენიმე საათის წინ ბანას დედამ დაპოსტა და თურქეთის პრემიერსა და პრეზიდენტს დახმარება სთხოვა.

„გთხოვთ, გააკეთეთ ყველაფერი ზავისთვის და გაგვიყვანეთ აქედან. ჩვენ ძალიან დავიღალეთ“ - ნათქვამია პოსტში.

აღმოსავლეთ ალეპოდან მშვიდობიანი მოსახლეობისა და ამბოხებულების ევაკუაცია 15 დეკემბერს დაიწყო და პირველივე დღეს, ცხრა ავტოკოლონით 6462 ადამიანი გაიყვანეს, მათ შორის 3000 მებრძოლი და 40-მდე დაჭრილი.

თუმცა, ევაკუაცია ალეპოს აღმოსავლეთ ნაწილიდან მას შემდეგ შეჩერდა, რაც მეამბოხეებმა ცეცხლი გაუხსნეს ერთ-ერთ კოლონას.

ამბოხებულები კი სამთავრობო არმიის მხარდამჭერ შიიტურ დაჯგუფებას იმ ავტობუსების დაცხრილვაში ადანაშაულებდენ, რომლებითაც მოსახლეობის ევაკუაცია ხდებოდა.

ევაკუაციის პროცესი გუშინ ღამე განახლდა.

გაეროს მონაცემებით, აღმოსავლეთ ალეპოში კიდევ 50 ათასამდე ადამიანია დარჩენილი.