"რუსეთში პუტინის გარეშე არაფერი ხდება" - ბარაკ ობამა ჰაკერული თავდასხმის შესახებ

მსოფლიო - 14:00, 17 Dec, 2016

2476

აშშ-ის მოქმედმა პრეზიდენტმა ბარაკ ობამამ განმარტა, რატომ ფიქრობს, რომ აშშ-ის წინასაარჩევნო პერიოდში „დემოკრატიული პარტიაზე“ ჰაკერული თავდასხმის განხორციელების გადაწყვეტილება, რუსეთის მთვრობის უმაღლეს დონეზე იქნა მიღებული.

ჟურნალისტის კითხვაზე, საიდან იცის, რომ რუსეთის პრეზიდენტმა პირადად გასცა ბრძანება კიბერშეტევაზე, ობამამ პუტინის ფორმალურ და არაფორმალურ როლზე ისაუბრა რუსეთის პოლიტიკაში.

„რუსეთში ცოტა რამე ხდება ვლადიმერ პუტინის ნებართვის გარეშე. ეს იერარქიულად მოწყობილი სისტემაა“ - განაცხადა ობამამ თეთრ სახლში პრესკონფერენციაზე.

„დაზვერვის მონაცემები, რომელსაც გავეცანი , მარწმუნებს იმაში, რომ კიბერთავდასხმა რუსეთმა განახორციელა“ - დასძინა ობამამ.

შეგახსენებთ, თეთრი სახლის განცხადებით, რუსეთის პრეზიდენტი ვლადიმერ პუტინი აშშ-ში წინასაარჩევნო კამპანიის დრო განხორციელებულ ჰაკერულ ოპერაციაში უშუალოდ მონაწილეობდა.

როგორც ბარაკ ობამას მრჩეველმა ბენ როუდსმა განაცხადა, ვლადიმერ პუტინი მკაცრად აკონტროლებს ყველა ოპერაციას, რომელსაც რუსეთის მთავრობა ახორციელებს, შესაბამისად, ის მომხდარის შესახებ ინფორმირებული იყო.

რუსეთის ხელისუფება აშშ-ის საპრეზიდენტო არჩევნების წინ განხორციელებულ კიბერთავდასხმებთან კავშირს კატეგორიულად უარყოფს.