ვლადიმერ პუტინი და სინძო აბე კურილიის სადავო კუნძულებთან დაკავშირებით თანამშრომლობაზე შეთანხმდნენ

მსოფლიო - 13:44, 16 Dec, 2016

2263

რუსეთის პრეზიდენტი, ვლადიმერ პუტინი ოფიციალური ვიზიტით იაპონიაში იმყოფება. პუტინმა უკვე გამართა მოლაპარაკება იაპონიის პრემიერ-მინისტრთან

იაპონიის პრემიერ-მინისტრის სინძო აბეს განცხადებით, რუსეთის პრეზიდენტი ვლადიმერ პუტინი და იაპონიის პრემიერ-მინისტრი სინძო აბე შეთანხმდნენ, რომ კურილიის კუნძულებზე ეკონომიკურ საქმიანობას ერთობლივად განახორციელებენ. თუმცა, აბეს თქმით, უახლოეს მომავალში რუსეთსა და იაპონიას შორის სამშვიდობო შეთანხმების ხელმოწერა მოსალოდნელი არ არის.

“მე და რუსეთის პრეზიდენტი შევთანხმდით, რომ ამ კუნძულებზე შეიქმნება განსაკუთრებული რეჟიმი ერთობლივი სამეურნეო საქმიანობის დასარეგულირებლად. ეს რეჟიმი მიმართული იქნება იმისკენ, რომ შეიქმნას პირობები მომავალში ამ პრობლემის გადასაწყვეტად” - განაცხადა აბემ იაპონიაში ვლადიმერ პუტინის ვიზიტის დასასრულს გამართულ პრესკონფერენციაზე.

“ჩვენი მხრიდან, მე შევთავაზე სახალინის ოლქისა და ჰოკაიდოს მცხოვრებლებს შორის თავისუფალი სასაზღვრო გადაადგილების რეჟიმის დაწესება” - განაცხადა პუტინმა.

კურილიის არქიპელაგის რამდენიმე კუნძულთან დაკავშირებით იაპონიასა და რუსეთს შორის ტერიტორიული დავა მეორე მსოფლიო ომის დასრულებიდან არსებობს. ოფიციალური ტოკიო მიიჩნევს, რომ კუნძულები იტურუპი, კუნაშირი, შიკოტანი და ჰაბომაი მას ეკუთვნის.

სწორედ , კურილიის კუნძულებთან დაკავშირებით არსებული დავა წარმოადგენს მთავარ პრობლემას, რომელიც რუსეთ-იაპონიას შორის მშვიდობიანი ხელშეკრულების გაფორმებას აბრკოლებს.