აღმოსავლეთ ალეპიდან მოსახლეობის ევაკუაციის შესახებ ახალ შეთანხმებას მიაღწიეს

მსოფლიო - 12:10, 15 Dec, 2016

2438

სირიაში, აღმოსავლეთ ალეპიდან მოსახლეობის ევაკუაციის შესახებ ახალ შეთანხმებას მიაღწიეს.

„ბიბისის“ ცნობით, ამის შესახებ, ზომიერი ოპოზიციის წარმომადგენლებმა განაცხადეს. მათი თქმით, სამშვიდობო შეთანხმება 15 დეკემბრის დილიდან უნდა შევიდეს ძალაში.

სააგენტო Reuters-თან საუბრისას ბაშარ ასადის მხარდამჭერი უცნობი დაჯგუფება ახალ შეთანხმებას ადასტურებს. მეამბოხეების თქმით, შეთანხმების ფარგლებში ალეპოს დატოვებას შეძლებენ მშვიდობიანი მაცოხოვრებლები, ასევე ამბოხებულები და მათი ოჯახის წევრები.

თუმცა, როგორც „ფრანს პრესი“ წყაროზე დაყრდნობით წერს, სირიის ხელისუფლება შეთანხმების მიღწევას არ ადასტურებს.

ევაკუაციის შესახებ წინა შეთახმება, რომლის მიღწევაც რუსეთისა და თურქეთის შუამავლობით მოხდა, ძალაში შესვლიდან რამდენიმე საათში დაირღვა. მოსახლეობის ევაკუაცია ოთხშაბათს, დილის 5 საათზე უნდა დაწყებულიყო. კონფლიქტის მხარეები ზავის დარღვევაში ერთმანეთს ადანაშაულებენ.

ადგილობრივი უფლებადამცველების განცხადებით, ცეცხლი ამბოხებულების მხრიდან არ გახსნილა.

BBC-ის ინფორმაციით, ალეპოს აღმოსავლეთ ნაწილში ამჟამად 50 ათასამდე მშიდობიანი მცხოვრები და დაახლოებით 400 ამბოხებული რჩება.