აღმოსავლეთ ალეპოში საბრძოლო მოქმედებები განახლდა

მსოფლიო - 15:14, 14 Dec, 2016

2281

სირიის ქალაქ ალეპოში საბრძოლო მოქმედებები განახლდა.

როგორც "ფრანს პრესი" იტყობინება, სირიელი ოპოზიციონერი აქტივისტების ინფორმაციით, სამთავრობო ძალები ამბოხებულთა იმ ჯგუფებს უტევენ, რომლებსაც ქალაქი ჯერ არ დაუტოვებიათ, თუმცა მსხვერპლი არის მშვიდობიან მოსახლეობაში.

ალეპოში საბრძოლო მოქმედებების განახლებას რუსული მხარეც ადასტურებს.

შეგახსენებთ, გუშინ, ღამე სირიის ქალაქ ალეპოზე მასშტაბური დაბომბვები განხორციელდა.

სირიის სამთავრობო არმია რუსული ავიაციის დახმარებით, ალეპოზე კონტროლის დასხმარებლად ქალაქს ბომბავდა, მიუხედავად იმისა, რომ მშვიდობიანმა მოსახლეობამ ქალაქის დატოვება ვერ შეძლო.

ადამიანის უფლებთა საკითხებზე მომუშავე გაეროს უმაღლესი კომისრის სამმართვლოს ოფიციალური წარმომადგენლის, რუპერტ კოლვილის განცხადებით, ბოლო 24 საათის განმავლობაში 83 მშვიდობიანი სამოქალაქო პირი ემსხვერპლა, მათ შორის 11 ქალი და 13 ბავშვია. მისი თქმით, არსებობს ინფორმაცია, რომ მოსახლეობა საკუთარ სახლებში ან ქუჩებში მოკლეს, მაშინ როდესაც ბომბებს გაურბოდნენ.

გაეროში რუსეთის მუდმივი წარმომადგენლის, ვიტალი ჩურკინის განცხადებით, სირიის მთავრობამ ალეპოს აღმოსავლეთ ნაწილზე კონტროლი დაამყარა, ხოლო სირიელმა აჯანყებულებმა თანხმობა განაცხადეს, აღმოსავლეთ ალეპო მთლიანად დატოვონ. მიღწეული შეთანხმების შესახებ ინფორმაციას ადასტურებენ თავად ამბოხებულებიც. ქალაქიდან განხორციელდა 5992 ადამიანის ევაკუაცია განხორციელდა, ხოლო 399-მა ამბოხეულმა იარაღი დაყარა და ქალაქის დასავლეთ ნაწილში გადავიდა.

აღმოსავლეთ ალეპოს ოთხი წლის განმავლობაში ამბოხებულები აკონტროლებდნენ. ბოლო რამდენიმე კვირის განმავლობაში სირიის სამთავრობო ძალები რუსეთის ავიაციის დახმარებით ქალაქის აღმოსავლეთ ნაწილზე ინტენსიურ შეტევას ახორციელებენ, რომლის შედეგადაც ამბოხებულები ქალაქიდან თითქმის განდევნეს. ამჟამად ალეპოს 98%-ს ასადის ძალები აკონტროლებენ.