ნავთობის ფასი წლის რეკორდულ მაჩვენებელზე ავიდა და 2015 წლის 21 ივლისის შემდეგ პირველად მიაღწია ბარელზე 57 დოლარს. აღნიშნული ცვლილება ნავთობის უმსხვილესი ექსპორტიორი ქვეყნების კარტელის ოპეკისა და ორგანიზაციის არაწევრ ნავთობმომპოვებელ 11 ქვეყანას შორის, მოპოვების შემცირების შესახებ შეთანხმების მიღწევას უკავშირდება.

შეთანხმების მიხედვით, მომავალ წელს არაწევრი ქვეყნები მოპოვების დღიურ ნორმას 558 ათასი ბარელით შეამცირებენ. ეს პირველი შეთანხმებაა კონკურენტებს შორის ბოლო 15 წლის განმავლობაში და შეთანხმებულ ქვეყნებზე მსოფლიო ნავთობის წარმოების 60 პროცენტი მოდის.

შედეგად, ნიუ-იორკისა და ლონდონის ბირჟებზე ზრდამ 5.8 და 6.6 პროცენტი შეადგინა და ლონდონში ფასი ბარელზე 57 დოლარი და 89 ცენტი იყო, რაც ყველაზე მაღალი მაჩვენებელია 2015 წლის ივლისის შემდეგ.