ჩინეთი დონალდ ტრამპის მიერ „ერთი ჩინეთის“ პოლიტიკის ეჭვქვეშ დაყენებით შეშფოთებულია

მსოფლიო - 17:43, 12 Dec, 2016

3711

ჩინეთი „სერიოზულად შეშფოთებულია“ მას შემდეგ, რაც აშშ-ის არჩეულმა პრეზიდენტმა დონალდ ტრამპმა ეჭვქვეშ დააყენა აშშ-ის მიერ „ერთიანი ჩინეთის“ პოლიტიკის გატარება.

„ჩინურმა მხარემ აღნიშნულ განცხადებაზე ყურადღება გაამახვილა. ჩვენ შეშფოთებას გამოვთქვამთ და მინდა აღვნიშნო, რომ ტაივანის საკითხი ეხება სახელმწიფოს სუვერენიტეტის, ტერიტორიული მთლიანობისა და ფუნდამენტური ინტერესების საკითხებს“ - განაცხადა ჩინეთის საგარეო საქმეთა სამინიტროს ოფიციალურმა წარმომადგენელმა გენ შუანმა, ტრამპის განცხადების კომენტირებისას.

აღნიშნული პოლიტიკის ფარგლებში, აშშ-ს ოფიციალური კავშირები ჩინეთთან უფრო მეტად გააჩნია, ვიდრე ტაივანის კუნძულთან, რომელსაც ჩინეთი სეპარატისტულ პროვინციად მიიჩნევს.

Fox News-თან ინტერვიუში დონალდ ტრამპმა განაცხადა, რომ ის ვერ ხედავს იმის მიზეზს თუ რატომ უნდა გააგრძელოს დათმობების პოლიტიკის გატარება ჩინეთთან მიმართებით.

„მესმის „ერთი ჩინეთის“ პოლიტიკა, თუმცა ვერ ვხვდები, რატომ უნდა დავუჭიროთ მას მხარი, თუ ჩინეთთან გარიგებას არ დავდებთ სხვა საკითხებთან დაკავშირებით, მათ შორის სავაჭრო სფეროში“ - განაცხადა დონალდ ტრამპმა.

1979 წლიდან ”ერთი ჩინეთის” პოლიტიკის ფარგლებში, აშშ ცნობს მხოლოდ ჩინეთის სახალხო რესპუბლიკას და არ ცნობს ტაივანს.

ტრამპმა ჩინეთის აღშფოთება დეკემბრის დასაწყისშიც მოახერხა, როდესაც ტაივანის ლიდერის სატელეფონო ზარს უპასუხა. მაშინ ჩინეთმა უკმაყოფილება გამოთქვა, რადგან ათწლეულის განმავლობაში აშშ-ის არც ერთ პრეზიდენტს არ ულაპარაკია უშუალოდ ტაივანის ლიდერთან.