რუსეთი აშშ-ის არჩევნებში ჩაერია - ცენტრალური სადაზვერვო სააგენტოს სკანდალური დასკვნა

მსოფლიო - 11:58, 10 Dec, 2016

11532

აშშ-ის ცენტრალური სადაზვერვო სააგენტო (CIA ) მიიჩნევს, რომ აშშ-ის 2016 წლის საპრეზიდენტო არჩევნებში რუსეთი ფარულად ჩაერია, იმისთვის რომ დონალდ ტრამპი დაწინაურებულიყო. CIA -ს კონფიდენციალურ შეტყობინებასთან დაკავშირებით ინფორმაციას The Washington Post-ი სამთავრობო წრეებში მყოფ წყაროზე დაყრდნობით ავრცელებს.

გამოცემის ინფორმაციით სააგენტომ გამოავლინა რამდენიმა პირი, რომლებიც დაკავშირებულნი არიან რუსეთის ხელისუფლებასთან და რომლებიც დემოკრატიული პარტიის შტაბის და ჰილარი კლინტონის ელექტრონული ფოსტის მასალებს WikiLeaks-ს აწვდიდნენ.

ამერიკის არჩეული პრეზიდენტის დონალდ ტრამპის გუნდი CIA-ის ინფორმაციას უარყოფს, მათ მუშაობას აკრიტიკებს და აცხადებს, რომ აღნიშნული ანგარიში წარმოადგინეს იგივე ადამიანებმა, „რომლებიც ამბობდნენ, რომ სადამ ჰუსეინს მასობრივი განადგურების იარაღი ჰქონდა“.

მანამდე, წარმომადგენელტა პალატის წევრებმა ელაია კამინგსმა და ერიკ სუოლუელმა კონგრესში კანონპროექტი შეიტანეს, რომელიც ითვალისწინებდა დამოუკიდებელი კომისიის შექმნას იმისთვის, რომ გამოძიებულიყო რუსეთის ხელისუფლების როლი იმ კიბერშეტევებში, რომელიც წინასაარჩევნო პერიოდში განხორციელდა. კომისიამ, რომლის შემადგენლობაშიც 12 ადამიანი იქნება, როგორც რესპუბლიკელებიდან ასევე დემოკრატებიდან, მუშაობის შედეგი შექმნიდან წელწად ნახევრის ვადაში უნდა წარმოადგინოს.

აშშ-ის არჩევნებში ჩარევაში დაადანაშაულა რუსეთი მოქმედი პრეზიდენტის ბარაკ ობამას ადმინისტრაციამაც. საქმე დემოკრატიული პარტიის შტაბზე განხორციელებულ კიბერშეტევას ეხებოდა.