პენტაგონის შეფი: აშშ აგრძელებს და კვლავაც უნდა გააგრძელოს რუსეთის აგრესიის წინააღმდეგ ბრძოლა

მსოფლიო - 17:34, 04 Dec, 2016

2692

აშშ თავდაცვის უწყების მოქმედი ხელმძღვანელი ეშტონ კარტერი კიდევ ერთხელ გამოვიდა რუსეთის კრიტიკით და განაცხადა, რომ აშშ აგრძელებს და კვლავაც უნდა გააგრძელოს რუსეთის აგრესიის წინააღმდეგ ბრძოლა, წინ აღუდგეს მისგან მომდინარე ძველ, ამჟამინდელ და მომავალ საფრთხეებს.

"ის, რასაც აკეთებს აშშ, როგორც ქვეყანა, თუ როგორც NATO-ს წევრი სახელმწიფო, არის იმის გარანტი, რომ ჩვენ კვლავაც წინ აღვუდგებით რუსეთის აგრესიას, რომ ჩვენ მზად ვართ ხანგრძლივი დაპირისპირებისათვის," - აცხადებს კარტერი.

"რუსული პოლიტიკა, მისი აგრესია და პროვოკაციები ყალბი ამბიციისა და უაზრო წყენების შედეგია, მოსკოვი უხეშად არღვევს საერთაშორისო სამართალს, შეიარაღებაზე კონტროლის შეთანხმებას და მსოფლიოს ბირთვული იარაღით აშინებს," - დასძინა კარტერმა რონალდ რეიგანის ბიბლიოთეკაში გამოსვლისას.

"არავის ჰქონდეს ილუზია! ჩვენ ყოველთვის დავიცავთ ჩვენს მოკავშირეებს, მსოფლიო წესრიგის პირობებს და იმ მომავალს, რომელსაც ეს წესრიგი უქადის კაცობრიობას," - განაცხადა კარტერმა გამოსვლის ბოლოს.

შეგახსენებთ, რომ ერთი წლის წინ ეშტონ კარტერმა მკვეთრი განცხადება გააკეთა რუსეთის მიერ საქართველოში, უკრაინასა და სირიაში განხორციელებული ქმედებების გამო.

ეშტონ კარტერი აგრეთვე მიესალმა ახალი ადმინისტრაციის განცხადებას პენტაგონის შეფად ჯეიმს მატისის წარდგენის შესახებ.

"მე მინდა მივულოცო გენერალ ჯეიმს მატისს, მე ჯიმისტან ერთად მიმუშავია, ვიცნობ მის შეხედულებებს. ის ჩემი მეგობარია და მის მიმართ უდიდესი პატივისცემის გრძნობა გამაჩნია," - აღნიშნა კარტერმა.