ლავროვი - რუსეთისა და იაპონიის პოზიციების შეთანხმება რთულია

მსოფლიო - 18:02, 03 Dec, 2016

2394

3 დეკემბერს, მოსკოვში, რუსეთის საგარეო საქმეთა მინისტრმა სერგეი ლავროვმა და იაპონიის საგარეო საქმეტა მინისტრმა ფუმიო კისიდამ რუსეთის პრეზიდენტის ვლადიმერ პუტინის იაპონიაში დაგეგმილი ვიზიტის დეტალები განიხილეს.

ვიზიტი 15-16 დეკემბერსაა დაგეგმილი. როგორც მინისტრებმა ერთობლივ პრესკონფერენციაზე განაცხადეს, პუტინი იაპონიაში ხელს მოაწერს ორ ქვეყანას შორის ეკონიმიკის, კულტურის, ჰუმანიტარულ და სამეცნიერო სფეროებში თანამშრომლობის შესახებ შეთანხმებებს.

საუბარი, ბუნებრივია, ორ ქვეყანას შორის სამშვიდობო ხელშეკრულების ხელმოწერის საკითხებსაც შეეხება.

"ამ საკითხზე ჩვენსც ვისაუბრეთ და ორივე მხარე თანხმდება, რომ ეს პრობლემა უნდა მოგვარდეს, თუმცა, დღეისათვის ამ კუთხით რუსეთისა და იაპონიის პოზიციების შეთანხმება რთულია. პრეზიდენტმა პუტინმა არაერთხელ განაცხადა, რომ ჩვენი ქვეყანა მზადაა გადაწყვიტოს ეს მოძველებული პრობლემა," - აღნიშნა ლავროვმა.

შეგახსენებთ, რომ რუსეთი და იაპონია მეორე მსოფლიო ომის შემდგომ ფაქტიურად კვლავ საომარ მდგომარეობაში არიან, რადგან კურილიის კუნძულების სსრკ-ს და ამჟამად რუსეთის შემადგენლობაში ყოფნის გამო, იაპონია სამშვიდობო ხელშეკრულებას ხელს არ აწერს.