კვირას, 27 ნოემბერს, საფრანგეთში ჩატარებულ პრაიმერიზში, რომელშიც მოსახლეობას რესპუბლიკური პარტიის პრეზიდენტობის კანდიდატი უნდა აერჩია, გამარჯვება ყოფილმა პრემიერ-მინისტრმა ფრანსუა ფიიონმა მოიპოვა.

ფრანგული პრესა ფიიონს უკვე დიდი ხანია "პუტინის მეგობარსა" და "პუტინოფილს" ეძახის. მედიის ინფორმაციით, ფიიონი და პუტინი 2007 წლის შემდეგ დამეგობრდნენ. ისინი ერთმანეთს "შენობით" მიმართავენ, წერს Le Monde და აღნიშნავს, რომ მათი შეხვედრები ხშირად პროტოკოლით გათვალისწინებულ ნორმებს სცილდება ხოლმე. ფიიონი პუტინის სტუმარი იყო 2008 წელს, როდესაც იგი რუსეთის პრეზიდენტის სოჭის რეზიდენციაში ჩავიდა. ოფიციალური შეხვედრა ბილიარდის ოთახში გაგრძელდა, რაც პროტოკოლით არ ყოფილა გათვალისწინებული.

პუტინს არაერთხელ გამოუხატავს თავისი სიმპატია ფიიონის მისამართით, ის მას პროფესიონალ და პროგრესულ პოლიტიკოსს ეძახის. განსაკუთრებული ყურადღება პუტინმა ფიიონის დედის გარდაცვალების დროს გამოიჩინა - სამძიმართან ერთად მან ფრანსუა ფიიონს 1931 წლის ღვინო გაუგზავნა, რადგან სწორედ ამ წელს დაიბადა ფიიონის დედა.