ფატალურად დასრულდა 20 წლის რუსი ნიჭიერი მოჭადრაკის, გროსმეისტერ იური ელისეევის ექსტრემალური გატაცება - მორიგი ტრიუკის დროს იგი მეთორმეტე სართულის ფანჯრიდან აივანზე გადაძრომას ცდილობდა და, სამწუხაროდ, ძირს ჩავარდა.

იური ელისეევი ერთერთი პერსპექტიული მოჭადრაკე იყო და მას დიდ მომავალს უწინასწარმეტყველებდნენ. იგი ასევე ანალიტიკური ნიჭითაც გამოირჩეოდა. 2007 წელს 12 წლის ასაკში, იგი საჭადრაკო ამოცანების ამოხსნაში მსოფლიო ჩემპიონი გახდა. 2012 წელს იგი რუსეთის ჩემპიონის ტიტულს დაეუფლა კლასიკურ ჭადრაკში და ამავე წელს 16 წლის ასაკის მოჭადრაკეთა შორის მსოფლიო ჩემპიონის ტიტულს დაეუფლა. 2013-ში მან გროსმეისტერის ტიტული მიიღო, ხოლო წელს ტურნირ Moscow Open-ში გაიმარჯვა.ელისეევი ფიდეს რეიტინგით 212-ე ადგილზე იყო.

როგორც მოჭადრაკის მეგობრები ამტკიცებენ, ელისეევი ხშირად აკეთებდა ასეთ ტრიუკებს და სოცქსელში სურათებს დებდა. ამის დამადასტურებელია ქვემოთ მოცემული ფოტოც, რომელიც მისმა მეგობარმა გოგონამ გაავრცელა. მასზე ასახულია თუ როგორ არის ჩამოკიდებული ელისეევი აივანზე.