ლიტვინენკოს საქმის ექსპერტი საკუთარ სახლში მკვდარი იპოვეს- ის 5 თვის წინ რუსეთს სტუმრობდა

მსოფლიო - 20:55, 25 Nov, 2016

5070

ადამიანის ორგანიზმზე რადიაციის ზეგავლენის საკითხებში ექსპერტი მეტიუ პანჩერი, რომელიც ალექსანდრ ლიტვინენკოს საქმის გამოძიებას ეხმარებოდა, ინგლისში, ქალაქ ოქსფორდში საკუთარ სახლში გარდაცვლილი იპოვეს. ინფორმაციას ამის შესახებ უცხოური მედია ავრცელებს.

მეცნიერი სისხლის დაკარგვის გამო გარდაიცვალა, რომელიც სხეულზე მიყენებულმა მრავლობითმა ჭრილობებმა გამოიწვია. წინასწარი ინფორმაციით პანჩერმა დანით ჭრილობები საკუთარ სხეულზე თავად მიიყენა, თუმცა პათოლოგანატომმა ბოლომდე არ გამორიცხა, რომ მის სიკვდილში შესაძლოა კიდევ ვინმე იყო ჩართული.

სწორედ პონჩერმა აღმოაჩინა პოლონიუმის კვალი ლიტვინენკოს სხეულში, რომელიც 2006 წელს ლონდონში მოწამლეს.

ბრიტანელი ექსპერტი ჯანდაცვის სამინისტროს ატომური ენერგიის კვლევით ინსტიტუტში მუშაობდა. მან ამერიკის ხელისუფლებასთან გააფორმა კონტრაქტი კვლევასთან დაკავშირებით, რომელიც საბჭოთა კავშირში ბირთვული იარაღზე მუშაობასთან დაკავშირებული ადამიანების ორგანიზმზე პოლონიუმის გავლენას სწავლობდა. გასულ შობას ის ამ კონტრაქტის ფარგლებში რუსეთში იმყოფებოდა საიდანაც 5 თვის წინ დაბრუნდა. როგორც მისმა მეუღლემ კეტრინმა გამომძიებლებს განუცხადა, დაბრუნებისას მისი ხასიათი ძალიან შეცვლილი იყო და გამუდმებით შეცდომაზე საუბრობდა, რომელიც თითქოს ანგარიშის შედგენის დროს დაუშვა. პანჩერის კოლეგა ჯორჯ ეტერინგტონმა განაცხადა, რომ პანჩერის შიშები, რომ ის დაშვებული შეცდომის გამო ამერიკულ ციხეში მოხვდებოდა ირაციონალური იყო.