ტერაბანკის კაპიტალი 10 მილიონი ლარით გაიზარდა

ბიზნესი & ეკონომიკა - 13:12, 24 Nov, 2016

1976

22 ნოემბერს ტერაბანკის აქციონერთა რიგგარეშე კრების გადაწყვეტილებით ბანკის სააქციო კაპიტალი 10 372 000 ლარით გაიზარდა. აქციონერთა გადაწყვეტილება საქართველოში ინვესტიციის მოცულობის გაზრდასთან დაკავშირებით, კიდევ ერთხელ ხაზს უსვამს, რომ ისინი საქართველოში ბიზნესსაქმიანობას გრძელვადიანი პერსპექტივით განიხილავენ და დაინტერესებულნი არიან ჩვენს ქვეყანასთან ბიზნესურთიერთობის გაღრმავებით.

„მივესალმებით აქციონერთა გადაწყვეტილებას, ვინაიდან, მათი ნდობა ჩვენი საქმიანობის მიმართ ძალიან დასაფასებელია. კაპიტალის მოცულობის ზრდა, ბუნებრივია, სასიკეთოდ აისახება ტერაბანკის მომხმარებლებზე. გაზრდილი კაპიტალი საშუალებას მოგვცემს გავზარდოთ დაკრედიტება, განსაკუთრებით მცირე და საშუალო ბიზნესის მიმართულებით, რაც ჩვენთვის სტრატეგიულ მიმართულებას წარმოადგენს.“ - აცხადებს ტერაბანკის გენერალური დირექტორი - თეა ლორთქიფანიძე.

22 ნოემბრის ხელმოწერით აქციონერებმა ტერაბნკის საერთო ინვესტიციის მოცულობის ზრდა დაადასტურეს და ამ დროისთვის ბანკის განაღდებული კაპიტალი 121 372 000 ლარს შეადგენს.

ტერაბანკი 17 წელია, რაც ქართულ საბანკო ბაზარზე წარმატებით ოპერირებს და აქტიურად უწყობს ხელს მცირე და საშუალო ბიზნესის განვითარებას. იგი შედის მძლავრ არაბულ საინვესტიციო კომპანია „დაბი ჯგუფში“, რომელიც საერთაშორისო ბაზარზე მრავალპროფილურ ბიზნესს ფლობს: ტურიზმის ინდუსტრია, უძრავი ქონება, დეველოპმენტი, წარმოება, საბანკო და ფინანსური მომსახურება, საზღვაო ჭაბურღილები და ა.შ. „დაბი ჯგუფი“ ორიენტირებულია, მძლავრი ფინანსური რესურსითა და მართვის გამოცდილებით გააფართოოს ინვესტიციები ფინანსურ საქმიანობაში, მათ შორის - საქართველოში.