ოკუპირებული გალი სამხედრო ქალაქად გამოცხადდა

პოზიცია - 16:10, 23 Nov, 2016

4986

ოკუპირებული გალი სამხედრო ქალაქად გამოცხადდა, შესაბამისი გადაწყვეტილება აფხაზეთის საოკუპაცუიო რეჟიმმა და ოფიციალურმა მოსკოვმა მიიღეს.

"ნიუპოსტის" ინფორმაციით, გალის ტერიტორიაზე 25-მდე რუსული სამხედრო საგუშაგო განთავსდა. ადგილობრივ მოსახლეობას კი ოჩამჩირეში გადაასახლებენ.

ჩვენი ინფორმაციით, ოკუპირებულ ე.წ თვითმართველ ორგანიოში რუსეთის დუმის დეპუტატებმა ამ თემაზე შეხვედრა გამართეს, სადაც გადაწყდა, რომ სოფელ სიდაში აეროპორტი აშენდება.

გალის რაიონის ზოგიერთი სოფელი ოჩამჩირის რაიონს, ხოლო ზოგი ტყვარჩელის რაიონს მიაკუთვნეს.

ამიერიდან აფხაზეთის ოკუპირებულ ტერიტორიაზე მაცხოვრებლებს სამხედრო ქალაქში საშვის გარეშე არ შეუშვებენ. საშვი უნდა წარადგინონ ე.წ. ერის წყალზე მდებარე რუსულ საგუშაგოში.

ადგილობრივების ინფორმაციით, რაიონში შემოსვლის მსურველთათვის ე.წ. საშვთა ახალი სისტემა ხუთშაბათიდან ამოქმედდა.

საშვთა სისტემა ეხება ტყვარჩელისა და ოჩამჩირის მხრიდან გალში შესვლის მსურველებს. რაც შეეხება რაიონის სოფლებში გადაადგილებას, ამ ეტაპზე მოსახლეობას საშვებს არ თხოვენ.

ოკუპირებული გალის სამხედრო ქალაქად გამოცხადებას, თავდაცვის მინისტრი ლევან იზორიაც გამოეხმაურა:

„ჩვენი მთავარი ამოცანაა ჩვენი საბრძოლო მზადყოფნა იყოს მაღალი, ჩვენ ჩვენი უნარით უნდა შევძლოთ ყველანაირ საფრთხეს ადეკვატური პასუხი გავცეთ. ამიტომ, ჩვენი შეიარაღებული ძალების სიძლიერე არის ყველაზე კარგი პრევენცია და აგრესიის თავიდან აცილება“ - განაცხადა თავდაცვის მინისტრმა, ლევან იზორიამ.

ცნობისთვის, რუსეთის პრეზიდენტმა ვლადიმირ პუტინმა ხელი მოაწერა რატიფიკაციის კანონს რუსეთსა და დე ფაქტო აფხაზეთს შორის ჯარების გაერთიანებული დაჯგუფების შექმნის შესახებ.

შეთანხმებას 2015 წლის 21 ნოემბერს, მოსკოვში მოეწერა ხელი და ითვალისწინებს გაერთიანებული საჯარისო დაჯგუფების ფორმირებას.

ერთობლივი დაჯგუფების მთავარი მიზანია რომელიმე მხარეზე შეიარაღებულ თავდასხმაზე ან სამხედრო საფრთხეზე რეაგირება.

მშვიდობიან პერიოდში გაერთიანებულ დაჯგუფებაში შემავალი სამხედრო დანაყოფების ურთიერთობის ორგანიზებას ახორციელებს ოპერატიული ჯგუფი, რომელიც მხარეების წარმომადგენლებისგან შედგენა. ოპერატიული ჯგუფის მეთაური არის გაერთიანებული რუსული სამხედრო ბაზის მეთაური.

ამავდროულად, რუსეთის სახელმწიფო დუმამ რუსეთსა და დე ფაქტო აფხაზეთს შორის სამართლებრივ საკითხებზე დახმარების შეთანხმების რატიფიცირება მოახდინა.

აღნიშნულ შეთანხმებას, 2015 წლის 28 მაისს, სანკტ-პეტერბურგში მოეწერა ხელი.

ამავდროულად, პუტინმა ხელი მოაწერა რატიფიკაციის კანონს რუსეთის ფედერაციასა და ოკუპირებულ აფხაზეთს შორის სისხლის სამართლის საქმეებზე ორმხრივი სამართლებრივი დახმარების შესახებ.

აღნიშნულ შეთანხმებას 2015 წლის 28 მაისს სანკტ-პეტერბურგში მოეწერა ხელი.