რეპერი კანიე უესტი ჰოსპიტალიზებულია

გუშინ, 21 ნოემბერს, კანიე უესტი "ნერვული აშლილობის დიაგნოზით" ლოს-ანჯელესის ერთ-ერთ საავადმყოფოში გადაიყვანეს. წყაროს ცნობით, ის ძალიან დასუსტებულია და მუდმივ უძილობას უჩივის.

დასავლური მედიის ცნობით, შუაღამისას, რეპერის ტრენერის სახლში, სადაც მას ექიმი სინჯავდა, პოლიცია გამოიძახეს. სამართალდამცავებს აცნობეს, რომ რამდენიმედღიანი უძილობის გამო, უესტს ნერვული აშლილობა აღენიშნებოდა.

პოლიციის მისვლიდან რამდენიმე წუთში, რეპერი საავადმყოფოში გადაიყვანეს.

როგორც სააგენტო TMZ იტყობინება, საავადმყოფოში ტრანსპორტირებისას, რეპერს ხელბორკილები დაადეს.

აღნიშნულ ფაქტამდე ერთი დღით ადრე, უესტმა ლონ-ანჯელესში, ტურნეს ფარგლებში დანიშნული კონცერტები მოულოდნელად გააუქმა.

ნიუ-იორკში გამართულ Angel Ball-ზე გამოსვლა გადადო რეპერის მეუღლემ კიმ კარდაშიანმაც, რომელიც მეუღლეს გვერდიდან არ შორდება.

აღსანიშნავია, რომ კიმ კარდაშიანი და კანიე უესტი აშშ-ის საპრეზიდენტო არჩევნებში ჰილარი კლინტონის მხარდამჭერები იყვნენ და ამას ღიად გამოხატავდნენ. რამდენიმე დღის წინ კი კონცერტზე, უესტმა სცენიდან განაცხადა, რომ თუკი საპრეზიდენტო არჩევნებში ვინმეს ხმას მისცემდა, ეს დონალდ ტრამპი იქნებოდა.