ანა პავლოვას უგემრიელესი დესერტი... დიდება მარწყვს და ბეზეს!

საზოგადოება - 23:46, 16 May, 2013

3412

როცა დიდი ბალერინა ანა პავლოვა ახალ ზელანდიაში, სასტუმრო "ველინგტონში" შევიდა, მისი დანახვით მოხიბლულმა რესტორნის მზარეულმა სასწრაფოდ მოამზადა მარწყვის გენიალური დესერტი და სახელად "პავლოვას დესერტი" უწოდა...

არის მეორე ვერსიაც, სადაც წაიკითხავთ, რომ ანას ეს საოცარი ტკბილეული ავსტრალიელმა მზარეულმა ბერტ საშემ უძღვნა და როცა მოამზადა, თქვა "ეს დესერტი ისეთივე ჰაეროვანია, როგორც პავლოვა". კულინარულ წიგნში პირველად სწორედ, ბერტ საშეს 1935 წელს შექმნილი რეცეპტია შეტანილი.

მოგვიანებით გაირკვა, რომ მსოფლიოში 300-მდე "პავლოვას რეცეპტია", სადაც მთავარი ინგრედიენტები - მარწყვი, ბეზე, ღვინის ძმარი და სიმინდის სახამებელია...

მაშ, ასე "პავლოვას დესერტის" კლასიკური ვარიანტი ასეთია: 4 კვერცხის ცილა გათქვიფეთ გათეთრებამდე, დაუმატეთ 1 ჭიქა შაქარი, გააგრძელეთ თქვეფა. დაუმატეთ 1კოვზი სიმინდის სახამებელი (ან კარტოფილის ფქვილი), 1 კოვზი თეთრი ღვინის გაფილტრული ძმარი და ვანილი. რადგანაც ბეზეს სახამებელი ემატება, ნამცხვრის ძირის ქერქი კნატუნაა და გული ნაზად ნამიანი.

გადაიტანეთ ბეზე ტორტის გამოსაცხობ ფორმაში და 150 გრადუსზე 40 წუთი გამოაცხეთ (რადგანაც ყველა აირღუმელი სხვადასხვაგვარად აცხობს, თავად "დაადგინეთ" გამოცხობის დრო - მთავარია ბეზე კარგად გამოცხვეს, გამოშრეს და არ გადაბრაწოთ!

ცალკე გათქვიფეთ მაღალპროცენტიანი ნაღები, დაუმატეთ 50 გრამი შაქარი. გადაიტანეთ გამომცხვარი ბეზე დიდ თეფშზე, გადაუსვით ზედ ათქვეფილი ნაღები და მოაყარეთ დაჭრილი მარწყვი. კლასიკურ ავსტრალიურ "პავლოვას დესერტს" მარწყვთან ერთად უმატებენ დაჭრილ ტროპიკულ ხილს, ჩვენ შეგვიძლია დავამატოთ კივი.