ისრაელი საქართველოსა და უკრაინის მოქალაქეებისთვის თავშესაფრის მიცემაზე ავტომატური უარის შემოღებას გეგმავს.

ამის შესახებ გამოცემა Haaretz-ი იტყობინება.

გამოცემის ცნობით, შინაგან საქმეთა სამინისტრომ უკვე მიმართა იუსტიციის სამინისტროს ახალი პოლიტიკის დასამტკიცებლად .

როგორც გამოცემა შინაგან საქმეთა უწყების მონაცემებზე დაყრდნობით წერს, ბოლო ხუთი წლის განმავლობაში საქართველოდან ისრაელში გადამსვლელ ტურისტთა რაოდენობა წელიწადში 91 ათასიდან 117 ათასამდე გაიზარდა. საქართველოსთან სავიზო რეჟიმი ისრაელმა 2014 წელს გააუქმა.

როგორც გამოცემა წერს, სავარაუდოდ ამ ფაქტით აიხსნება ის , რომ საქართველოს მოქალაქეებისგან ისრაელში ცხოვრების უფლების მოთხოვნა 2012 წელს საერთოდ არ ყოფილა, 2013 წელს ასეთი 4 განცხადება შევიდა, 2014 წელს - 51, 2015 წელს - 603, ხოლო 2016 წლის ბოლოსთვის უკვე უფრო დიდ რაოდენობას ვარაუდობენ.

გარდა ამისა, როგორც მიგრაციის სამსახურში აღნიშნავენ, ისრაელში სულ უფრო იზრდება იმ ქართველების რიცხვი, რომლებიც არალეგალად ცხოვრობენ და მუშაობენ.

პრობლემას წარმოადგენს არალეგალი უკრაინელების დიდი ოდენობაც. ისრაელის შინაგან საქმეთა სამინისტროს ცნობით, უკრაინელები თავშესაფრის მოთხოვნას არმიის მობილიზაციით და დეზერტირობის ბრალდებით დაკავების შიშით ხსნიან, ქართველობის არგუმენტს კი ის წარმოადგენს, რომ ისინი ოპოზიციას მიეკუთვნებიან და ხელისუფლების თვითნებობის ეშინიათ.