მეგის ქარდავას ადვოკატის განცხადებით, ბესელიამ ფარული კადრების ჩაწერის ორგაინიზატორად მოიხსენია მისი დაცვის ქვეშ მყოფი ისე, რომ მეგის ქარდავას არც ამ და არც სხვა თემზე ბრალი ამ დრომდე არ აქვს წარდგენილი.

"ნიუპოსტი" გთავაზობთ მეგის ქარდავას ადვოკატის მალხაზ ველიჯანაშვილის განცხადებას ამ საკითხთან დაკავშირებით:

"მოგახსენებთ, რომ ბოლო პერიოდში საზოგადოების და მასმედიის დიდ ინტერესს იწვევს სექსუალური უმცირესობების წარმომადგენელთათვის ფარულად გადაღებული კადრები, რასთან დაკავშირებითაც, როგორც პროკურატურა აცხადებს, მიმდინარეობს გამოძიება.

აღნიშნულ ფაქტთან დაკავშირებით, ჩვენს აღშფოთებას იწვევს ის გარემოება, რომ პროკურატურამ თავისი მოხსენებაში აღნიშნული ქმედების ორგანიზატორად მოიხსენია ჩემი დაცვის ქვეშ მყოფი მეგის ქარდავა ისე, რომ იგი პასუხისგებაში მიცემული არც მაშინ არ ყოფილა და არც დღეს არ არის. აღნიშნული უდანაშაულობის პრეზუმციის დარღვევის ფაქტის გამო მე მივმართე სახალხო დამცველ ბატონ უჩა ნანუაშვილს 3 თვის წინ, მაგრამ უფლების დარღვევა სახალხო დამცველისგანაც რეაგირების გარეშე დარჩა.

ყველაზე მეტად ჩვენი გაკვირვება და აღელვება კი გამოიწვია იმ ფაქტმა, როდესაც საქართველოს პარლამენტის წევრი, და ამავდროულად, ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელია არღვევს ადამიანის უფლებებს, მაშინ, როდესაც სწორედ იგია ვალდებული დაიცვას საქართველოს თითოეული მოქალაქის უფლება.

კერძოდ, ეკა ბესელიამ 2013 წლის 14 მაისს რუსთავი 2–ის გადაცემა "პოზიციაში", განაცხადა, რომ მეგის ქარდავა უზრუნველყოფდა ფარული ჩანაწერების მოპოვებას და მას ამ ფაქტთან დაკავშირებით ბრალი აქვს წარდგენილი. სწორედ აღნიშნული განცხადებით უფლებათა დამცველმა ეკა ბესელიამ მეგის ქარდავასთან მიმართებაში დაარღვია კონსტიტუციით უზრუნველყოფილი უფლება – უდანაშაულობის პრეზუმფცია და ყოველგვარი საფუძვლის გარეშე (ვინაიდან მას დღემდე ბრალი არ აქვს წარდგენილი აღნიშნულ ფაქტზე) მოიხსენია დანაშაულის ორგანიზატორად, რაც დაუშვებელია ნებისმიერი ადამიანის მხრიდან, განსაკუთრებით კი უფლებადამცველი ეკა ბესელიას მხრიდან. ვფიქრობთ, აღნიშნული ფაქტი საზოგადოების რეაგირების გარეშე არ უნდა დარჩეს.

ადვოკატი: მალხაზ ველიჯანაშვილი".