სირიის პრეზიდენტმა ბაშარ ასადმა იმედი გამოთქვა, რომ აშშ-ის ახლადარჩეული პრეზიდენტი დონალდ ტრამპი ისლამისტების წინააღმდეგ ბრძოლაში მისი მოკავშირე გახდება, თუმცა ამავდროულად ეჭვი გამოთქვა, რომ ამერიკელმა მილიარდერმა თავისი დაპირებები შეასრულოს.

ამის შესახებ ასადმა პორტუგალიურ RTP-სთან ინტერვიუში განაცხადა.

წინასაარჩევნო კამპანიის დროს ტრამპი აცხადებდა, რომ არასწორი იქნებოდა ერთდროულად სირიის სამთავრობო ძალებისა და “ისლამური სახელმწიფოს” წინააღმდეგ ბრძოლა. ის ასევე აცხადებდა, რომ სირიის ძალების წინააღმდეგ ბრძოლამ შესაძლოა რუსეთთან შეიარაღებული კონფლიქტი გამოიწვიოს.

სატელევიზო ინტერვიუში ბაშარ ასადმა დონალდ ტრამპს სირიის “ბუნებრივი მოკავშირე” უწოდა.

„ჩვენ ვერ ვიტყვით, რის გაკეთებას აპირებს, მაგრამ... თუ ტერორიზმის წინააღმდეგ ბრძოლას აპირებს, რა თქმა უნდა , ჩვენ მოკავშირეები ვიქნებით, ბუნებრივი მოკავშირეები, როგორც რუსეთის, ირანისა და სხვა ქვეყნების შემთხვევაში“ - აცხადებს ასადი.

იმავე ინტერვიუში სირიის პრეზიდენტმა თურქეთის ლიდერს რეჯეპ ტაიპ ეროდღანს “ავადმყოფი ადამიანი” და “მანიაკი” უწოდა, რომელიც რეალობას მოწყვეტილია.