"პრემიერის განცხადებები თვალებში ნაცრის შეყრაა"- პაატა შეშელიძე ლარის გაუფასურების მიზეზებზე

ბიზნესი & ეკონომიკა - 10:39, 14 Nov, 2016

1908

„ახალი ეკონომიკური სკოლა - საქართველოს პრეზიდენტი“ პაატა შეშელიძე არ იზიარებს პრემიერის შეფასებებს ლარის კურსის გაუფასურების მიზეზებთან დაკავშირებით, შეშელიძის თქმით მას არ აქვს მოლოდინი, რომ პრობლემა უახლოეს პერიოდში მოგვარდება:

“მოხმარება თუ გაზრდილია, ხალხი როგორ ღარიბდება, თუ იმპორტი გაზრდილია, საიდან შევიძინოთ ის თუ შემოსავლები არ გვაქვს, ექსპორტი თუ შემცირებულია, იმპორტი როგორ გაიზარდა? ძალიან ბევრი კითხვითი ნიშანი გამიჩნდა. ფული უფასურდება იმიტომ, რომ ეროვნული ბანკი ბეჭდავს უფრო მეტ ფულს, ვიდრე ეს საჭიროა და აძლევს საშუალებას ბანკებს, რომ ინტენსიურად გასცენ სესხები, რომელიც არ არის უზრუნველყოფილი რეალური დანაზოგებით. მთავრობა იღებს ძალიან ბევრ სესხს შიდა ბაზარზე და წამოწყებული აქვთ ისეთი პროექტები, რომელიც ხელოვნურად ზრდის მოთხოვნას. ეს ყველაფერი თუ არ შეიცვალა, არაფერი გამოსწორდება. ამიტომ, პრემიერის განცხადებები, სინამდვილეში თვალებში ნაცრის შეყრაა,“-განაცხადა პაატა შეშელიძემ "რ2"- თან საუბარში.

ლარის კურსის ვარდნასთან დაკავშირებით პრემიერ-მინისტრმა კომენტარი გუშინ გააკეთა, გიორგი კვირიკაშვილი ამბობს, რომ ერთ-ერთი მიზეზი იმპორტის რაოდენობის ზრდაა, რომლის კორექტირებაც, პრემიერის თქმით, უკვე დაწყებულია. კვირიკაშვილი იმედოვნებს, რომ დაგეგმილი რეგულაციები ლარის კურსის დასტაბილურებას უზრუნველყოფს.