ტრამპის შემდეგ, მარი ლე პენს საფრანგეთის საპრეზიდენტო არჩევნებში გამარჯვების იმედი აქვს

მსოფლიო - 20:07, 13 Nov, 2016

5210

საფრანგეთის ულტრ მემარჯვენე პარტიის ,,ეროვნული ფრონტის“ ლიდერი მარი ლეპენი აცხადებს, რომ დონალდ ტრამპის გამარჯვებამ გაზარდა მისი შანსები, გახდეს საფრანგეთის პრეზიდენტი 2017 წლის არჩევნებში.

,,ბი-ბი-სი“-თან ინტერვიუში ლეპენი ამბობს, რომ ტრამპმა დაუშვა იმის შესაძლებლობა, რაც მანამდე შეუძლებლად ითვლებოდა.

ლე პენმა ასევე ისაუბრა რუსეთსა და მისი მმართველის შესახებ და რუსეთის პრეზიდენტი ვლადიმერ პუტინის მმართველობის სტილს გონივრული პროტექციონიზმი უწოდა. მან ასევე დასძინა, რომ ,,ის, ვინ იცავს საკუთარი ქვეყნის ინტერესებს, იცავს მის იდენტობას“.

რაც შეეხება შეკითხვას რუსული საფრთხის შესახებ, განსაკუთრებით 2014 წლის ყირიმის ანექსიისა და სირიაში რუსეთის სამხედრო ოპერაციის დაწყების შემდეგ, ლე პენი პასუხობს, რომ ,,შიშის მიზეზი არ არსებობს“.

,,რუსეთი ევროპული ქვეყანაა და თუ ჩვენ გვსურს შევქმნათ ძლიერი ევროპა, უმჯობესი იქნება, წარვმართოთ მოლაპარაკებები რუსეთთან“ - განმარტა ლე პენმა.

არსბობს მოლოდინი, რომ მარი ლე პენმა 2017 წლის საფრანგეთის საპრეზიდენტო არჩევნებში მეორე ტურში შეძლოს გასვლა.

ანალიტიკოსები თვლიან, რომ ასეთ შემთხვევაში სხვა დანარჩენი პარტიები მის კონკურენტს გამოუცხადებენ მხარდაჭერას.

თუმცა, დონალდ ტრამპის წარმატება, მისი გამოსვლები საემიგრაციო პოლიტიკისა და გლობალიზაციის წინააღმდეგ, ისევე როგორც ბრიტანეთის რეფერენდუმის შედეგები ევროკავშირიდან გამოსვლის შესახებ, ატლანტიკის ორივე მხარეს პოლიტიკური ისტებლიშმენტი ააფორიაქა.