ბრიტანული "The Guardian"-ის სტატიაში NATO-ს გენერალური მდივანი იენს სტოლტენბერგი კიდევ ერთხელ მიმართავს აშშ-ს არჩეულ პრეზიდენტს დონალდ ტრამპს და ჩრდილოატლანტიკურ ალიანსთან აშშ-ს მჭიდრო თანამშრომლობის აუცილებლობის შესახებ საუბრობს.

"ამჟამად ჩვენ ვდგავართ ჩვენი ეპოქისათვის ყველაზე დიდი გამოწვევების წინაშე, რომელიც მსოფლიოს უსაფრთხოების ეხება და ახლა ნამდვილად არ არის ევროპისა და აშშ-ს მჭიდრო პარტნიორობის ღირებულებების გადახედვაზე საუბრის დრო," - აცხადებს სტოლტენბერგი.

"თავისი არსებობის მანძილზე NATO-მ მხოლოდ ერთხელ გამოიყენა წესდების 5-ე მუხლი და ეს მოხდა მაშინ, როდესაც აშშ-ში 2001 წლის 11 სექტემბერს ტერაქტები განხორციელდა. ეს არ იყო მხოლოდ სიმბოლური მხარდაჭერა, ალიანსმა აიღო თავის თავზე ავღანეთის ოპერაციის განხორციელება, სადაც ათიათასობით ჯარისკაცი მსახურობდა და მსახურობს. ათასზე მეტმა ჯარისკაცმა ყველაზე ღირებული - სიცოცხლეც კი გაიღო ამ ოპრაციაში, და ეს ოპერაცია იყო პირდაპირი პასუხი ამერიკაზე თავდასხმიას," - ნათქვამია სტატიაში.

გენერალური მდივნის შეფასებით, უკანასკნელ წლებში უსაფრთხოების მიმართუოლებით ვითარება გაუარესდა, რაშიც ახლო აღმოსავლეთსა და ჩრდილო აფრიკაში არასტაბილურობამ შეუწყო ხელი. სტოლტენბერგი ტრამპს რუსეთის ძალაზე დაფუძნებულ, აგრესიულ საგარეო პოლიტიკასაც ახსენებს და მომავალი ცივი ომის საფრთხეებზეც საუბრობს, რომლის წინააღმდეგაც აუცილებელია კოლექტიური თავდაცვის მეთოდების გაძლიერება, რათა დაცული იყოს დემოკრატიისა და თავისუფლებების ევრო-ატლანტიკური ღირებულებები. მისი თქმით, დღევანდელ დროს მარტო დარჩენა არ არის გამოსავალი და გლობალურ უსაფრთხოებას ძლიერი ამერიკა და ერთიანი ევროპა სჭირდება.

შეგახსენებთ, რომ ტრამპმა წინასაარჩევნო კამპანიის დროს არაერთხელ აღნიშნა, რომ ჩრდილოატლანტიკური ალიანსი მოძველებული ორგანიზაციაა და იგი მისი დაფინანსების მნიუშვნელოვან შემცირებას აპირებს.

სტატიაში სტოლტენბერგი ტრამპის განცხადებას ნაწილობრივ ეთანხმება და აღნიშნავს, რომ ფინანსური პასუხისმგებლობის გადანაწილება მართლაც უფრო თანაბარი იყოს, რადგან დღეისთვის, NATO-ს ხარჯების 70% აშშ აფინანსებს.