უმცირესობის ერთ-ერთი ლიდერი მიიჩნევს, რომ ხვედელიძის გირაოთი გათავისუფლება, არის დასტური იმისა, რომ საბოლოო ჯამში ყველაფერი განვითარდა, როგორც ფარსი.

,,გელა ხვედელიძე ზუსტად იგივე წარმომავლობის ადამიანია, როგორიც ნაცვლიშვილი. ისიც რუსეთთან დაახლოებული პირია და არც მისი გაწირვა იქნებოდა სასურველი. უბრალოდ, ხელისუფლება დადგა გარდაუვალი აუცილებლობის წინაშე - არსებობდა ის მასალები, რომლებიც ყველა შემთხვევაში დაიდებოდა და აქედან გამომდინარე, პრევენციულად იმოქმედა - დააკავა ხვედელიძე მხოლოდ იმისათვის, რომ ეთქვათ - როგორი სამართლიანი ხელისუფლებაა, საკუთარი მინისტრის მოადგილეც კი დააკავა... მაგრამ, ელემენტარულად, იმაზეც ვერ წავიდა, რომ თანამდებობიდან გაეთავისუფლებინა. ამიტომ პრევენციული სეგმენტის ძალა არ არის სუსტი ჯერ-ჯერობით. არათუ ნაცვლიშვილს, ხვედელიძესაც კი ვერ შეეხნენ საბოლოო ჯამში ისე, როგორც ეს უნდა ყოფილიყო. სხვა შემთხვევაში, რა თქმა უნდა, რეალური გამოძიება რომ წარიმართოს იმ ფაქტებისა, რომელიც უკვე სახეზეა, მაშინ ხვედელიძეც და ნაცვლიშვილიც რეალურად დაკავებული უნდა იყვნენ და არა გირაოთი გათავისუფლებულნი", - აცხადებს გივი თარგამაძე.

რაც შეეხება გივი თარგამაძის სამომავლო გეგმებს, საგამოძიებო ჟურნლისტურ საქმიანობაში მის ჩართავასთან დაკავშრებით, ,,ნიუპოსტის" კითხვაზე, თუ რამდენად თავსებადი იქნება დეპუტატის საქმიანობასთან, უმცირესობის ერთ-ერთი ლიდერი აცხადებს, რომ ეს ორი სფერო თითქმის ერთი და იგივეა და ერთმანეთს ავსებს კიდეც.

,,მე ჩამოსვლისთანავე განვაცხადე, რომ ვაპირებ ჩემი ძირითადი დრო დავუთმო ჩემს სამშობლოში მიმდინარე პროცესებს, ასე რომ მაქსიმალურად ვიქნები საქართველოში, დამატებითი დატვირთვა იმდენი აღარ მექნება, ხოლო რაც შეეხება ჟურნალისტური საგამოძიებო საქმიანობის და დეპუტატობის შეხამებას, ეს დაახლოებით ერთი და იგივეა... ერთმანეთს არათუ ხელს არ უშლის, ავსებს კიდეც და ვფიქრობ, მე ეს არ გამიჭირდება", - განაცხადა გივი თარგამაძემ.