კრემლი ტრამპის ადმინისტრაციისგან კონსტრუქციულ სიგნალებს ელოდება

მსოფლიო - 11:19, 11 Nov, 2016

1956

რუსეთის პრეზიდენტის პრესსპიკერის დიმიტრი პესკოვის განცხადებით, რუსეთის ხელისუფლებას აშშ-ის ახალი პრეზიდენტი მოსკოვში ჯერ არ მიუწვევია და მოქმედ ადმინისტრაციასთან მუშაობას აგრძელებს.

„უნდა დაველოდოთ რაღაც კონსტრუქციულ სიგნალებს“ - განუცხდა პესკოვმა ჟურნალისტებს.

მისივე თქმით, ყველასთვის ნათელია, რომ მოსკოვსა და ვაშინგტონს შორის ყველა საკითხზე სრული შეთანხმება ვერ მიიღწევა.

„მოსკოვსა და ვაშინგტონს შორის აზრთა სხვადასხვაობა გარდაუვალია. თუმცა მთავარია პოლიტიკური ნება და სურვილი, ყველა პრობლემა დიალოგის გზით გადაიჭრას“ - აღნიშნა კრემლის პრესსპიკერმა.

პესკოვის თქმით, ოფიციალური რუსეთი ოპტიმისტურად უყურებს წინასაარჩევნო კამპანიის ფარგლებში ტრამპის მიერ გამოთქმულ განცხადებებს.

აშშ-ის საპრეზიდენტო არჩევნებამდე რამდენიმე კვირით ადრე, დონალდ ტრამპი აცხადებდა, რომ გამარჯვების შემთხვევაში რუსეთის პრეზიდენტს ვლადიმირ პუტინს აუცილებლად შეხვდებოდა და ეს შეხვედრა შედგებოდა მის ინაუგურაციამდეც.

აღსანიშნავია, რომ ტრამპი პუტინს გონიერ პოლიტიკოსად მოიხსენიებდა და გამოსვლებში აცხადებდა, რომ აშშ-რუსეთის დაძაბული ურთიერთობის მიზეზი ის არის, რომ ამერიკელი ლიდერები რუსეთის პრეზიდენტს ხშირად აყენებენ შეურაცხყოფას.