აშშ-ის გამოძიების ფედერალური ბიუროს (FBI) დირექტორმა ჯეიმს კომიმ ამერიკის შეერთებული შტატების კონგრესს აცნობა, რომ დემოკრატიული პარტიის საპრეზიდენტო კანდიდატის, ჰილარი კლინტონის ელექტრონულ წერილებში კრიმინალის ნიშნები არ აღმოჩნდა.

FBI-ის ხელმძღვანელმა ელექტრონული წერილების შემოწმების შედეგების შესახებ კონგრესში გამართულ შეხვედრაზე ისაუბრა.

როგორც ჰილარი კლინტონის საარჩევნო შტაბის წარმომადგენელმა განაცხადა, ისინი მოხარულები არიან, რომ ეს საკითხი მოგვარდა.

კლინტონის იმეილების საქმე 2015 წლის მეორე ნახევარში დაიწყო. გამოძიების ცნობით, კლინტონი სახელმწიფო მდივნობის პერიოდში (2009-13), სამსახურებრივი მიმოწერისას დაცული იმეილის სერვერის ნაცვლად, კერძო სერვერს იყენებდა. კანონის მიხედვით კი, აშშ-ში თანამდებობის პირები ვალდებულები არიან, სამსახურებრივი მიმოწერა დაცული და არა კერძო ელექტრონული სერვერიდან აწარმოონ.

კლინტონის იმეილების საქმეზე გამოძიება 2016 წლის ივლისში, ბრალის წარდგენის გარეშე შეწყდა, თუმცა, მოგვიანებით, FBI-ს ხელმძღვანელი ჯეიმს კომი აცხადებდა, რომ გამოძიება შესაძლოა, განახლებულიყო, რადგანაც საქმეში ახალი სამხილები გამოვლინდა.