თურქეთის ხელისუფლებამ სამხედრო ამბოხის მეორე სავარაუდო ორგანიზატორის ვინაობა დაასახელა

მსოფლიო - 11:32, 03 Nov, 2016

3590

თურქეთის ხელისუფლებამ სახელმწიფო გადატრიალების მცდელობაში მეორე მთავარი ეჭვმიტანილის ვინაობა დაასახელა. თურქული მედიის ცნობით, ის ადგილობრივი ქაღალდის კომპანიის დირექტორი ქემალ ბათმაზია, რომელიც დაკავებულია.

თურქეთის ხელისუფლება ვარაუდობს, რომ ბათმაზი გადატრიალების ერთ-ერთ მთავარ სულისჩამდგმელ, უნივერსიტეტის ყოფილ თანამშრომელ ადილ ოქსიუზთან თანამშრომლობდა, რომელიც სამხედრო ამბოხის მეორე დღესვე დააკავეს.

როგორც ხელისუფლება აცხადებს, სამხედრო გადატრიალების მცდელობამდე ბათმაზი და ოქსიუზი ამერიკაში იმყოფებოდნენ, სადაც ფეთჰულა გიულენს შეხვდნენ. გამოძიების ცნობით, ისინი აშშ-ში 11 ივლისს ჩავიდნენ და თურქეთში 13 ივლისს დაბრუნდნენ.

შეგახსენებთ, 15 ივლისის ღამეს, თურქეთში მომხდარი სამხედრო ამბოხის შემდეგ ათიათასობით ადამიანი დააკავეს.

ოფიციალური ანკარა სამხედრო გადატრიალების მცდელობის ორგანიზატორად პრეზიდენტ ერდოღანის ოპოზოციონერ , სასულიერი პირს ფეთჰულა გიულენს ამბოხის ორგანიზატორად ასახელებს და ვაშინგტონისგან მის ექსტრადირებას ითხოვს. ოფიციალური ვაშინგტონი თავისმხრივ აცხადებს, რომ მზად არის გიულენი თურქეთს გადასცეს, თუკი ოფიციალური ანკარა მისი დანაშაულის მტკიცებულებებს წარადგენს.

თავად გიულენი კი სამხედრო გადატრიალების მცდელობასთან კავშირს უარყოფს.

ფეთჰულა გიულენი 1999 წლიდან პენსილვანიაში ცხოვრობს.

სამხედრო გადატრიალების მოწყობის მცდელობას 230 ადამიანი ემსხვერპლა, მათი უმრავლესობა თავად სამხედროა.

15 ივლისის შემდეგ სამსახურიდან დაითხოვეს 10 000 ადამიანი - ათასობით სამხედრო, მოსამართლე, პოლიციელი, მასწავლებელი. ქვეყანაში დაიხურა 100-ზე მეტი მედიასაშუალება დაიხურა, რის შედეგადაც სამსახურის გარეშე დარჩა 2 300-ზე მეტი ჟურნალისტი.

15 ივლისის მოვლენების შემდეგ თურქეთში მინიმუმ 99 ჟურნალისტი და მწერალი დააკავეს, მინიმუმ 330-ს აკრედიტაცია ჩამოართვეს

გიულენთან კავშირის გამო დააკავეს მისი ძმა, ძმისშვილი და რძალიც.