ტურისტული კომპანია „ბავარია ტურს“-ის და უკრაინაში საქართველოს საელჩოს ორგანიზებით, ქ. ლვოვში საქართველოს ტურისტული პოტენციალის პრეზენტაცია გაიმართა.

პრეზენტაციის მიზანი დასავლეთ უკრაინის რეგიონებში საქართველოს პოპულარიზაცია იყო.

ღონისძიებაზე დამსწრე საზოგადოებას სიტყვით მიმართა უკრაინაში საქართველოს საგანგებო და სრულუფლებიანმა ელჩმა მიხეილ უკლებამ. აჭარის ტურიზმისა და კურორტების დეპარტამენტის წარმომადგენლებმა წარადგინეს პრეზენტაცია აჭარის რეგიონის ტურისტული პოტენციალის შესახებ.

ღონისძიებას 60-მდე ტურ-ოპერატორი კომპანიის წარმომადგენელი დაესწრო.

ლვოვში ვიზიტის ფარგლებში უკრაინაში საქართველოს საგანგებო და სრულუფლებიანმა ელჩმა შეხვედრა გამართა ლვოვის საოლქო ადმინისტრაციის ხელმძღვანელთან ოლეგ სინიუტკასთან.

შეხვედრაზე საუბარი შეეხო ეკონომიკის, ტურიზმის, ჯანდაცვის და განათლების სფეროებში თანამშრომლობას.

საუბრისას მხარეების მიერ ხაზი გაესვა ქ. ლვოვიდან საქართველოს მიმართულებით პირდაპირი ავია-მიმოსვლის შესაძლო აღდგენის მნიშვნელობას, რაც თავის მხრივ ხელს შეუწყობს თანამშრომლობის შემდგომ განვითარებას. შეხვედრისას მხარეებმა ასევე ისაუბრეს ქ. ლვოვში საქართველოს საპატიო კონსულის ოფისის გახსნის შესაძლებლობაზე.