შემთხვევა წინამძღვრიშვილის 90 ნომერში, ღამის საათებში მოხდა. ყაჩაღებმა ბინაში მოტყუებით შეაღწიეს და ოჯახის სამ წევრს იარაღის მუქარით ფული მოსთხოვეს. სახლში მყოფებმა მათ განუმარტეს, რომ 30 ლარზე მეტი არ ჰქონდათ და ეს თანხა გადასცეს, თუმცა, თავდამსხმელებმა მუქარა გააგრძელეს.

ამის შემდეგ ოჯახის უფროსმა მათ წინააღმდეგობა გაუწია, რის შემდეგაც სამი თავდამსხმელი მას ფიზიკურად გაუსწორდა. ასევე სასტიკად სცემეს მცირეწლოვანი ბიჭი, რომელმაც სცადა, მამას მიშველებოდა.

მეზობლები ყაჩაღობის ფაქტს ადასტურებენ, თუმცა, დაზარალებულთა ვინაობას, ოჯახის სურვილის გათვალისწინებით, არ ასახელებენ. მათ არც ის იციან, აღიძრა თუ არა სისხლის სამართლის საქმე:

"მგონი, რაღაც მიზეზების გამო პოლიციისთვის არც მიუმართავთ", - უთხრა "ნიუპოსტს" ერთ-ერთმა მცხოვრებმა,- "ამის მიზეზი ისაა, რომ მოგვიანებით გაიგეს, თითქოს ყაჩაღებისთვის ცრუ "ნაკოლის" მიმცემი მათი ახლო ნათესავი აღმოჩნდა. არ უნდათ, შარში გახვიონ", - აღნიშნა წინამძღვრიშვილის ქუჩაზე მცხოვრებმა. მისივე თქმით, არსებობს ვერსია, რომ ყაჩაღები მეზობელ უბანში მცხოვრები ამნისტირებული პატიმრები იყვნენ.

მომხდარ ფაქტზე კომენტარისთვის "ნიუპოსტი" შსს-ს საზოგადოებასთან ურთიერთობის დეპარტამენტის ხელმძღვანელს ნინო გიორგობიანს დაუკავშირდა, რომელმაც განაცხადა, რომ ამ ყაჩაღობის შესახებ არანაირი ინფორმაცია არა აქვს.