რუსეთის გარიცხვა გაეროს ადამიანის უფლებათა დაცვის საბჭოდან

რუსეთის გარიცხვა გაეროს ადამიანის უფლებათა დაცვის საბჭოდან - 80 საერთაშორისო ორგანიზაციის პეტიცია

მსოფლიო - 12:42, 25 Oct, 2016

5050

საერთაშორისო ორგანიზაციები გაეროს ადამიანის უფლებათა დაცვის საბჭოდან რუსეთის გარიცხვას მოითხოვენ. განცხადებას ხელს 80 გავლენიანი არასამთავრობო ჰუმანიტარული და უფლებადამცველი ორგანიზაცია აწერს. მათ შორის არიან Human Rights watch და Care international.

დოკუმენტის ავტორები განმარტავენ, რომ მოსკოვი სირიაში სამხედრო ოპერაციებს ატარებს, რომელთა სამიზნეც მშვიდობიანი მოქალაქეები და სამოქალაქო ობიექტები ხდება. შესაბამისად, რუსეთი, რომელსაც გაერო-ს უშიშროების საბჭოში ვეტოს უფლება აქვს, რეგულარულად ბლოკავს ნებისმიერ რეზოლუციას, რომელიც სირიაში ცეცხლის შეწყვეტისკენ არის მიმართული. შესაბამისად, რუსეთს არ აქვს უფლება იყოს გაეროს იმ ინსტანციის წევრი, რომელიც ადამიანის უფლებების დაცვას ისახავს მიზნად.

საერთაშორისო ორგანიზაციები მოუწოდებენ გაეროს ადამიანის უფლებათა დამცველ საბჭოს, გადაწყვეტილება ახალი წევრების არჩევნებამდე მიიღოს.

რუსეთი გაერო-ს ადამიანის უფლებების საბჭოს წევრი 2013 წლიდანაა. საბჭოს ახალი შემადგენლობის არჩევის პროცედურა 28 ოქტომბერს გაიმართება.