ქურთმა მებრძოლებმა ISIS-ის კონტროლქვეშ მდებარე ქალაქი ბაშიქი ალყაში მოაქციეს

მსოფლიო - 16:45, 24 Oct, 2016

4715

ერაყში მდებარე ქალაქი ბაშიქი, რომელსაც ტერორისტული დაჯგუფება "ისლამური სახელმწიფო" აკონტროლებს, ქურთმა მებრძოლებმა ალყაში მოაქციეს.

ბაშიქი ქალაქ მოსულიდან 12 კილომეტრში მდებარეობს.

ქურთ მებრძოლთა რაზმების წარმომადგენლების განცხადებით, მათ დაიკავეს მთავარი მაგისტრალი, რომლითაც მოსულში მყოფი ჯიჰადისტების მომარაგება ხორციელდებოდა.

როგორც ოფიციალური ანკარა ამტკიცებს, ქურთ მებრძოლებს თურქი სამხედროები უწევენ დახმარებას. თუმცა ერაყის ხელისუფლება მოსულის გათავისუფლების ოპერაციაში თურქეთის მონაწილეობას კატეგრიულად უარყოფს.

შეგახსენებთ, 17 ოქტომბერს ერაყის სამთავრობო არმიამ ტერორისტული დაჯგუფება "ისლამური სახელმწიფოსგან" ქალაქ მოსულის გათავისუფლების ოპერაცია დაიწყო.

ერაყის შეიარაღებულ ძალებს აშშ-ის ხელმძღვანელობის მოქმედი საერთაშორისო კოალიცია ეხმარება.

ერაყის ჩრდილოეთ პროვინციაში მდებარე, სიდიდით მეორე ქალაქზე შეტევა, შესაძლოა 2003 წლის შემდეგ, შეერთებული შტატების მეთაურობით შექმნილი კოალიციის მიერ განხორციელებული ყველაზე მასშტაბური სახმელეთო ოპერაცია იყოს.

ქალაქ მოსულის დაჯგუფება “ისლამური სახელმწიფოს” მებრძოლები 2014 წლის ივნისიდან აკონტროლებენ.

მოსული ერაყში ტერორისტული დაჯუფება "ისლამური სახელმწიფოს" უკანასკნელი მსხვილი დასაყრდენია. ხელისუფლების განცხადებით, მისი გათავისუფლება მთელი ქვეყნის მასშტაბით „ისლამურ სახელმწიფოზე“ გამარჯვებას ნიშნავს.

სწორედ მოსულში განაცხადა "ისლამური სახელმწიფოს" ლიდერმა აბუ ბაქრ ალ-ბაღდადმა ხალიფათის შექმნის შესახებ.

მოსულის გათავისუფლების ოპერაცია რამდენიმე თვის განმავლობაში იგეგმებოდა. ქალაქში მაცხოვრებელი ადამიანების შესახებ ზუსტი მონაცემები არ არსებობს.

ორი წლის წინ, ექსტრემისტების მიერ ქალაქის დაპყრობამდე იქ ორ მილიონზე მეტი ადამიანი ცხოვრობდა.