ნინო რამიშვილის მოდა და ეპოქა თბილისის მოდის კვირეულზე

ნინო რამიშვილის მოდა და ეპოქა თბილისის მოდის კვირეულზე - რა ოცნება აუსრულდათ "სუხიშვილებს"

შოუ ბიზნესი - 15:00, 20 Oct, 2016

5327

„სასიამოვნო მოლოდინი იყო სხვა ფორმაში მენახა ჩემი მოცეკვავეები“ - უთხრა „ნიუპოსტს“ ილიკო სუხიშვილმა. სასიამოვნო მოლოდინი ჰქონდა თბილისის მოდის კვირეულზე შეკრებილ ყოველ სტუმარსაც. მოდელების როლი ხომ ამჯერად „სუხიშვილების“ მოცეკვავეებმა მოირგეს. მოლოდინს კი მოცეკვავეთა სხეულზე მორგებული ნინო რამიშვილის ულამაზესი კაბების ნახვა ჰქმნიდა. თბილისის მოდის კვირეულის მე 14-ე სეზონი დაანონსებული აღმაშენებლის გამზირის ნაცვლად, უამინდობის გამო ნაციონალური ბალეტის მოცეკვავეებმა საკრებულოს დარბაზში გახსნეს.
ჩირაღდნებით განათებული მინი პოდიუმები, ნინო რამიშვილის პირადი კოლექციიდან, დახვეწილი და მდიდრული სტილის ულამაზესი კაბები და სუხიშვილების პლასტიკა, მართლაც რომ შთამბეჭდავი იყო.

„უცხო არ არის ჩვენთვის სცენა ამიტომ მოდელის ამპლუაში ყოფნა არ იყო რთული“ - გაუმხილეს „ნიუპოსტს“ სუხიშვილის მოცეკვავეებმა.

თათია უკლება: „საპასუხისმგებლოსთან ერთად ძალიან სასიამოვნო და ძალიან საამაყო იყო ჩვენთვის ეს გამოსვლა. თითქოს თითოეული ჩვენგანი გადავიდა იმ ეპოქაში, თითოეულში იყო რაღაც ნინო რამიშვილისეული, მოძრაობა, სიულეტი... ჩვენს თავებს არ ვგავდით. ყოველ მოცეკვავეს ჰქონია ოცნებად რომ მოერგო ნინო რამიშვილის კაბა, ამ დღემ ყველას ოცნება ასრულდა“.

ნათია ბაკურაძე: „ეს არ არის ჩვეულებრივი ჩვენება ეს არის რაღაც განსაკუთრებულად გრაციოზული. ნინო რამიშვილის საოცარი კაბები მოვირგეთ და ვართ ძალიან ბედნიერები. რთული იყო იმდენად რამდენადაც ქალბატონი ნინო რამიშვილის კაბები გვეცვა, ძალიან ვნერვიულობდი. რადგან ეს არ იყო ჩვეულებრივი ჩვენება“.

ნინო რამიშვილი: „ეს არის ეპოქა, ეს არის ნამდვილი ვინტაჟი. საქართველოში მეოცე საუკუნის ერთ-ერთი ელეგანტური ქალბატონის გარდერობი. თქვენ დღეს იხილეთ 50-იან 60-იან წლებში მსოფლიოს ცნობილი დიზაინერების მიერ ქალბატონი ნინოსთვის შექმნილი სამოსები. ეს არის სხვადასხვა პერიოდში შეკერილი კაბები. ამ კაბებში ძირითადად კონცერტის შემდეგ, თავის დასაკრავად გამოდიოდა, ეს იყო კონცერტის მესამე განყოფილება.“
დეა თავბერიძე - ნიუპოსტი