ერაყის ქალაქი მოსული 900-მა მაცხოვრებელმა დატოვა

მსოფლიო - 15:23, 19 Oct, 2016

2932

გაეროს უმაღლესი კომისარი ლტოლვილთა საკითხებში აცხადებს, რომ ისლამისტებისგან ერაყის ქალაქ მოსულის გათავისუფლევის ოპერაციის დაწყებიდან , მოსული 900-მა ადამიანმა დატოვა, ყველა მათგანმა სირიის საზღვარი გადაკვეთა. ისინი ამჟამად ლტოლვილთა ბანაკში იმყოფებიან.

ეს პირველი ნაკადია, რომელმაც მოსული დატოვა.

გაერო-ს ლტოლვილთა უმაღლეს კომისარიატში შიშობენ, რომ ანალოგიური მარშრუტი, მოსულიდან გაქცევის მიზნით, შესაძლოა „ისლამური სახელმწიფოს“ წევრებმაც გამოიყენონ.

თავის მხრივ, მიგრაციის საერთაშორისო ორგანიზაციაში შიშობენ, რომ ისლამისტები ქიმიურ იარაღს გამოიყენებენ.

შეგახსენებთ, ორშაბათს ერაყის სამთავრობო არმიამ ტერორისტული დაჯგუფება "ისლამური სახელმწიფოსგან" ქალაქ მოსულის გათავისუფლების ოპერაცია დაიწყო.

ერაყის შეიარაღებულ ძალებს აშშ-ის ხელმძღვანელობის მოქმედი საერთაშორისო კოალიცია ეხმარება.

ერაყის ჩრდილოეთ პროვინციაში მდებარე, სიდიდით მეორე ქალაქზე შეტევა, შესაძლოა 2003 წლის შემდეგ, შეერთებული შტატების მეთაურობით შექმნილი კოალიციის მიერ განხორციელებული ყველაზე მასშტაბური სახმელეთო ოპერაცია იყოს.

ქალაქ მოსულის დაჯგუფება “ისლამური სახელმწიფოს” მებრძოლები 2014 წლის ივნისიდან აკონტროლებენ.

მოსული ერაყში ტერორისტული დაჯუფება "ისლამური სახელმწიფოს" უკანასკნელი მსხვილი დასაყრდენია. ხელისუფლების განცხადებით, მისი გათავისუფლება მთელი ქვეყნის მასშტაბით „ისლამურ სახელმწიფოზე“ გამარჯვებას ნიშნავს.

სწორედ მოსულში განაცხადა "ისლამური სახელმწიფოს" ლიდერმა აბუ ბაქრ ალ-ბაღდადმა ხალიფათის შექმნის შესახებ.

მოსულის გათავისუფლების ოპერაცია რამდენიმე თვის განმავლობაში იგეგმებოდა. ქალაქში მაცხოვრებელი ადამიანების შესახებ ზუსტი მონაცემები არ არსებობს.

ორი წლის წინ, ექსტრემისტების მიერ ქალაქის დაპყრობამდე იქ ორ მილიონზე მეტი ადამიანი ცხოვრობდა.