ამერიკულ საიტებზე კიბერთავდასხმისთვის ჩეხეთში რუსი ჰაკერი დააკავეს

მსოფლიო - 12:36, 19 Oct, 2016

1576

ჩეხეთის პოლიციამ აშშ-ის საიტებზე კიბერთავდასხმაში ეჭვმიტანილი პირი დააკავა, რომელიც რუსეთის მოქალაქეა. პირი, რომლის ვინაობაც ჯერჯერობით არ სახელდება, პრაღის ცენტრში, სასტუმროში აიყვანეს.

ჩეხეთის პოლიციის ცნობით, ოპერაცია ამერიკის გამოძიების ფედერალურ ბიუროსთან თანამშრომლობით ჩატარდა. რუსეთის მოქალაქე ინტერპოლის წითელი ცირკულარით იძებნებოდა. ჩეხი სამართალდამცავების განცხადებით ამ მომენტისთვის ხელისუფლება მისი ექსტრადიციის საკითხს განიხილავს.

ოქტომბრის დასაწყისში აშშ-ის შინაგან საქმეთა სამინისტრომ და ეროვნული დაზვერვის სამსახურმა ერთობლივი განცხადება გაავრცელეს, რომელშიც რუსეთის ხელისუფლება ოფიციალურად დაადანაშაულეს ამერიკის პოლიტიკური სტრუქტურების საიტებზე ჰაკერული თავდასხმის ორგანიზებაში.

ამერიკელი სამართალდამცავების განცხადებით საქმე ეხება DCLeaks და WikiLeaks-ზე ამერიკელი პოლიტიკოსების მიმოწერის გამოქვეყნებას, ასევე ჰაკერ Guccifer 2.0-ის საქმიანობას, რომელმაც პასუხისმგებლობა აიღო აშშ-ის დემოკრატიული პარტიის სერვერების გატეხვაზე.

მოსკოვი ბრალდებებს უარყოფს. რუსეთის საგარეო საქმეთა სამინისტროს განცხადბეით ვაშინგტონის ბრალდებები კონკრეტული ფაქტებით არაა გამყარებული. ვლადიმერ პუტინის პრესმდივანმა დიმიტრი პესკოვმა ბრალდებებს სისულელე უწოდა.