თბილისის მოდის კვირეულის მეათე სეზონს 19 ოქტომბერს სრულიად განსხვავებული შოუ გახსნის. „პოდიუმზე“ სუხიშვილების ნაციონალური ბალეტის მოცეკვავეებს ვიხილავთ. ისინი გასული საუკუნის ყველაზე ელეგანტური ქალბატონის ნინო რამიშვილის კაბებს მოირგებენ.

14 კაბა ნინო რამიშვილის პირადი კოლექციიდან თბილისის მოდის კვირეულისთვის ნინო სუხიშვილმა შეარჩია. ნინო ბავშვობას და ამ კაბებთან დაკავშირებულ დეტალებს იხსენებს.

ნინო სუხიშვილი: „ბავშვობაში, შევძვრებოდი ბებიაჩემის კარადაში და იქედან ვიღებდი რაღაცებს, ფეხსახმელებში ვყოფდი ფეხებს, არადა ეს ფეხსაცმელები ძალიან დიდი მქონდა, ვიხურავდი ქუდებს, ვიცმევდი კაბებს და ძალიან ბედნიერი ვიყავი... ქალბატონ ნინოს კი მახსოვს საათზე მეტი სჭირდებოდა სანამ სახლიდან გავიდოდა. ჯადოსნური დიდი სარკე ჰქონდა და ამ სარკის წინ ირთვებოდა. ეს იყო მისთვის მთელი რიტუალი. ძირითადად ამ კაბებში კონცერტის შემდეგ თავის დასაკრავად გამოდიოდა, ეს იყო კონცერტის მესამე განყოფილება, ყველა ელოდებოდა რომელ კაბაში გამოვიდოდა.

50-იანი წლების ევროპული სტილი, დახვეწილი სილუეტი და მდიდრული დეტალები... ნინო რამიშვილი შანელის, არმანის და სხვა დიზაინერების კაბებს ხშირად უხამებდა აღმოსავლურ სტილს. თავსაბურავები და აქსესუარები მისი იმიჯის უცვლელი ნაწილი იყო.

გასული საუკუნის ერთ-ერთი გამორჩეული სტილის ქალბატონის პირადი კოლექციით თბილისის მოდის კვირეული შემოდგომის სეზონს 19 ოქტომბერს 19:00 საათზე აღმაშენებლის გამზირზე გახსნის.