"ისლამურმა სახელმწიფომ" შესაძლოა, მოსულში მშვიდობიანი მოსახლეობა ცოცხალ ფარად გამოიყენოს"

"ისლამურმა სახელმწიფომ" შესაძლოა, მოსულში მშვიდობიანი მოსახლეობა ცოცხალ ფარად გამოიყენოს" - აშშ

მსოფლიო - 12:22, 18 Oct, 2016

4110

ვაშინგტონში მიიჩნევენ, რომ რადიკალური ექსტრემისტული დაჯგუფება „ისლამური სახელმწიფოს“ მებრძოლებმა ერაყის ქალაქ მოსულში, შესაძლოა, მშვიდობიანი მოსახლეობა, ცოცხალ ფარად გამოიყენონ.

"ვვარაუდობთ, რომ ისინი უყოყმანოდ დააყენებენ სამოქალაქო პირებს დარტყმის ქვეშ ქალაქის დაცვის დროს” -განაცხადა თეთრი სახლის პრესსპიკერმა ჯოშ ერნესტმა.

„ვვარადუდობთ, რომ ისინი ამორალურ და საშიშ ხერხებს გამოიყენებენ იმისთვის, რომ ქალაქი შეინარჩუნონ" - განაცხადა ერნესტმა.

ერნესტის თქმითვე, ერაყის შეიარაღებული ძალები დიდ უპირატესობას ფლობენ, რადგან მათ აშშ და კოალიციის პარტნიორები ავიადარტყმებით ეხმარებიან.

შეგახსენებთ, ორშაბათს ერაყის სამთავრობო არმიამ ტერორისტული დაჯგუფება "ისლამური სახელმწიფოსგან" ქალაქ მოსულის გათავისუფლების ოპერაცია დაიწყო.

ამის შესახებ ერაყის შეიარაღებული ძალების მეთაურმა, პრემიერ-მინისტრმა ჰაიდერ აბადიმ სატელევიზიო მიმართვისას განაცხადა.

ერაყის ჩრდილოეთ პროვინციაში მდებარე, სიდიდით მეორე ქალაქზე შეტევა, შესაძლოა 2003 წლის შემდეგ, შეერთებული შტატების მეთაურობით შექმნილი კოალიციის მიერ განხორციელებული ყველაზე მასშტაბური სახმელეთო ოპერაცია იყოს.

ქალაქ მოსულის დაჯგუფება “ისლამური სახელმწიფოს” მებრძოლები 2014 წლის ივნისიდან აკონტროლებენ.

მოსული ერაყში ტერორისტული დაჯუფება "ისლამური სახელმწიფოს" უკანასკნელი მსხვილი დასაყრდენია. ხელისუფლების განცხადებით, მისი გათავისუფლება მთელი ქვეყნის მასშტაბით „ისლამურ სახელმწიფოზე“ გამარჯვებას ნიშნავს.

სწორედ მოსულში განაცხადა "ისლამური სახელმწიფოს" ლიდერმა აბუ ბაქრ ალ-ბაღდადმა ხალიფათის შექმნის შესახებ.

მოსულის გათავისუფლების ოპერაცია რამდენიმე თვის განმავლობაში იგეგმებოდა. ქალაქში მაცხოვრებელი ადამიანების შესახებ ზუსტი მონაცემები არ არსებობს.

ორი წლის წინ, ექსტრემისტების მიერ ქალაქის დაპყრობამდე იქ ორ მილიონზე მეტი ადამიანი ცხოვრობდა.