ტრამპის პრეზიდენტად არჩევა საერთაშორისო თვალსაზრისით საშიში იქნება

ტრამპის პრეზიდენტად არჩევა საერთაშორისო თვალსაზრისით საშიში იქნება - გაეროს უმაღლესი კომისარი

მსოფლიო - 18:33, 12 Oct, 2016

3351

დონალდ ტრამპის აშშ-ის პრეზიდენტად არჩევა საერთაშორისო თვალსაზრისით საშიში იქნება. ამის შესახებ გაერო-ს უმაღლესმა კომისარმა ადამიანის უფლებების საკითხებში ზეიდ რაად ზეიდ ალ-ჰუსეინმა განაცხადა.

მისი თქმით, სოციალურ საკითხებზე ტრამპის ზოგიერთი განცხადება ღრმა შეშფოთებას იწვევს.

„თუკი დონალდ ტრამპს აირჩევენ, მისი განცხადებების საფუძველზე, ჩემი მოსაზრებით, საერთაშორისო თვალსაზრისით ეს საშიში იქნება“ - განაცხადა გაერო-ს უმაღლესმა კომისარმა.

გაეროს უმაღლესმა კომისარმა ტრამპის ძველი განცხადება გაიხსენა, რომ ის წამების გამოყენების მომხრეა, რაც საერთაშორისო სამართლით არის აკრძალული.

შეგახსენებთ, ტრამპი აშშ-ის პრეზიდენტმა ბარაკ ობამამაც მკაცრად გააკრიტიკა და პარტიის წევრებს მოუწოდებს, მის მხარდაჭერაზე ოფიციალურად თქვან უარი.

ბარაკ ობამას თქმით, ტრამპი არ შეესაბამება კანდიდატურას, რომელმაც აშშ საერთაშორიო ასპარეზზე უნდა წარადგინოს. აშშ-ის პრეზიდენტის თქმით, ამისთვის ტრამპს არც ცოდნა გააჩნია და არც მომზადება.

მისი თქმით, ტრამპი ეჭვქვეშ აყენებს ისეთ ფუნდამენტურ ღირებულებებს, როგორიცაა ტოლერანტობა, სამართლებრივი პროცედურების დაცვა და ურთიერთპატივისცემა. "ჩვენი დემოკრატია ამგვარად არ მუშაობს" - განაცხადა ბარაკ ობამამ.

აღსანიშნავია, რომ მას შემდეგ, რაც „ვაშინგტონ პოსტმა“ 2005 წლის სატელევიზიო შოუს ჩანაწერი გაავრცელა, რესპუბლიკელთა რამდენიმე მთავარმა ფიგურამ ტრამპის მხარდაჭერაზე უარი განაცხადა. ჩანაწერში ტრამპი ქალების მიმართ შეურაცხმყოფელ განცხადებებს აკეთებს და აცხადებს, როდესაც „ვარსკვლავი ხარ, შეგიძლია ქალებს ისე მოექცე, როგორც მოგინდება“.