ადვოკატებმა პარიზის ტერაქტებში ბრალდებული სალაჰ აბდესლამის დაცვაზე უარი განაცხადეს

მსოფლიო - 12:10, 12 Oct, 2016

2175

პარიზის ტერაქტებში ბრალდებული სალაჰ აბდესლამი შესაძლოა ადვოკატების გარეშე დარჩეს.

როგორც ცნობილი გახდა, აბდესლამის ადვოკატები ფრანკ ბერტონი და სვენ მარი მის დაცვაზე უარს აცხადებენ.

„ბიბისის“ ცნობით, როგორც ფრანგულ მედიასთან ადვოკატები აცხადებენ, სასამართლოზე აბდესლამი სავარაუდოდ დუმილის უფლებას გამოიყენებს.

„რას ელით ჩვენგან ასეთ ვითარებაში? ჩვენ თავდაპირველადვე ვთქვით, რომ თუ ჩვენი კლიენტი დუმილის უფლებას გამოიყენებს, ჩვენ მის დაცვაზე უარს ვიტყვით” - განაცხადა ბერტონმა ფრანგულ ტელეკომპანია BFM TV-სთან ინტერვიუში.

ბენტონის პოზიციას იზიარებს მარიც.

ფრანგული კანონმდებლობის თანახმად, სისხლის სამართლის საქმეში ბრალდებული ადვოკატმა უნდა დაიცვას. იმ შემთხვევაში, თუკი აბდესლამი ახალ ადვოკატების აყვანას ვერ შეძლებს, მის უფლებებს სახელმწიფო სახაზინო ადვოკატი დაიცავას.

ბელგიელი ადვოკატი სვენ მარი აბდესლამის ინტერესებს მარტიდან, ბრიუსელში მისი დაკავებიდან იცავს. მარი ცნობილი ადვოკატია, რომელიც ყველაზე მძიმე დანაშაულში ბრალდებულების დაცვას საკუთარ თავზე იღებს.

თავდაპირველად მარიმ განაცხადა, რომ აბდესლამი სამართალდამცველებთან თანამშრომლობისთვის მზად იყო. ადვოკატი ეჭვმიტანილის საფრანგეთში ექსტრადირების გასაჩივრებას გეგმავდა. თუმცა აპრილში ბელგიამ აბდესლამი საფრანგეთს გადასცა, რის შემდეგაც საქმეში მარისთან ერთად ფრანგი იურისტი ფრანკ ბერტონიც ჩაერთო.

როგორც ფრანგული მედია წერდა, საფრანგეთში ექსტრადირების დღიდან სალეჰ აბდესლამი კითხვებზე პასუხის გაცემაზე უარს აცხადებდა, მათ შორის თავისი ადვოკატების მიერ დასმულ კითხვებზე.

შეგახსენებთ, 13 ნოემბერს პარიზის ცენტრში განხორციელებული 6 კოორდინირებული ტერაქტის მსხვერპლი 129 ადამიანი გახდა. ტერაქტებზე პასუხისმგებლობა რადიკალურმა ექსტრემისტულმა დაჯგუფება "ისლამურმა სახელმწიფომ" აიღო.

26 წლის სალაჰ აბდესლამი, რომელიც ბელგიაში დაბადებული ფრანგია, 4თვიანი ძებნის შემდეგ 18 მარტს ბრიუსელში, მოლენბეკის კომუნაში დააკავეს. მასთან ერთად დაკავებულია კიდევ 4 პირი. სპეცოპერაციისას აბდესლამი ფეხში დაიჭრა. დაკავების შემდეგ აბდესლამმა განაცხადა, რომ საფრანგეთის ხელისუფლებასთან თანამშროლობისთვის მზად იყო.