გიორგი ლიფონავა: ციხის კადრები რომ დამონტაჟებული იყო, ნებისმიერს დავუდასტურებ

საზოგადოება - 18:51, 10 May, 2013

11037

რეჟისორი ამბობს, რომ მან მართლაც დაპატიჟა საკუთარ სტუდიაში საქართველოს პრეზიდენტი იმისათვის, რომ მიხეილ სააკაშვილისთვის "რეჟისორულად" დაედასტურებინა ე.წ. ციხის კადრების სიყალბე.

,,ვადასტურებ, რომ მსგავს შემთხვევას ადგილი მართლაც ჰქონდა. მე ავუხსენი პრეზიდენტს თუ რატომ ვფიქრობდი რომ ციხის კადრები დამონტაჟებული იყო. ამას ნებისმიერს დავუდასტურებ, თუმცა ახლა გადაღებებზე ვარ და ამის დრო ნამდვილად არ მაქვს", - განაცხადა "პოლიტიკოსთან" საუბრისას გიორგი ლიფონავამ.

შეგახსენებთ, რომ საქართველოს პრეზიდენტის მიხეილ სააკაშვილის განცხადებით, ციხის კადრები, რომლებიც სექტემბრის მეორე ნახევარში გავრცელდა, დამონტაჟებული იყო, რაშიც რეჟისორმა გიორგი ლიფონავამ დაარწმუნა. ამის შესახებ სააკაშვილმა ივანე ჯავახიშვილის სახელობის სახელმწიფო უნივერსიტეტში სტუდენტებთან შეხვედრისას განაცხადა.

სააკაშვილი ამბობს, რომ ლიფონავამ ის სტუდიაში ღამის სამ საათზე მიიყვანა და კონკრეტული ხაზები აჩვენა.

"ძალიან ადვილი სანახავია. ლიფონავამ პირდაპირ ხაზებით ამიხსნა. მეორეჯერ, რომ ნახავ, მართლა ხვდები რომ ესეა. მაგრამ ძალადობა იყო და ასეთ სადისტებს ჰქონდათ თავისუფლად მოქმედების საშუალება",- ამბობს სააკაშვილი.