UNICEF-ის ანგარიშის თანახმად, 5-დან 14 წლამდე გოგოები 40%-ით მეტ დროს უთმობენ საოჯახო საქმეებს, ვიდრე ბიჭები.

კვლევის თანახმად, მსგავსი სიტუაციის გამო, გოგოებს გაცილებით ნაკლები დრო რჩებათ განათლების მისაღებად, განვითარებისა და სოციალიზაციისთვის, ან უბრალოდ გართობისა და თამაშისთვის.
ფონდის ანგარიშის თნახმად, მთელი მსოფლიოს მასშტაბით გოგონები დღე-ღამეში 160 მილიონ საათზე მეტ დროს ხარჯავენ საჭმლის მომზადებაში, დასუფთავებასა და ოჯახის წევრების მოვლაში, ვიდრე ბიჭები. განსაკუთრებით რთული ვითარებაა სამხრეთ აზიის ქვეყნებში, ახლო აღმოსავლეთსა და აფრიკის ზოგიერთ ნაწილში. სახლის საქმეები უკიდურესად არათანაბრადაა განაწილებული იემენში, სომალსა და ბურკინა ფასოში.

როგორც ორგანიზაციის ანგარიშშია საუბარი, სომალიში 10-დან 14 წლამდე ასაკის გოგო საოჯახო საქმის კეთებას კვირის განმავლობაში 26 საათს უთმობს ანუ ფაქტობრივად მთელ თავისუფალ დროს.

ფაქტობრივად, მშობლები საკუთარ მოვალეობებს შვილებს, უფრო სწორად ქალიშვილებს აკისრებენ. ზოგიერთ ოჯახში გოგონებს წყლისა და შეშის მოტანაც ევალებათ, ზოგან კი უმცროსი დედმამიშვილების მოვლა.

ექსპერტების განმარტებით, ასეთი ვითარება გენდერულ უთანასწორობას კიდევ უფრო ამწვავებს და ქალებს თვითრეალიზაციის შესაძლებლობას უმცირებს.