ამერიკის შეერთებული შტატების პრეზიდენტობის რესპუბლიკელი კანდიდატი დონალდ ტრამპი რუს ოლიგარქებთან არის დაკავშირებული . ამის შესახებ დემოკრატების ვიცე-პრეზიდენტობის კანდიდატმა ტიმოთი კეინმა მაიკლ პენსთან ტელედებატებისას განაცხადა.

“ჰილარი კლინტონს რუსეთისთვის წინააღმდეგობის გაწევა შეუძლია მაშინ, როდესაც ტრამპი ისევ და ისევ ვლადიმერ პუტინის ქებას აგრძელებს და ცხადია, რომ მას საქმიანი კავშირი აქვს რუს ოლიგარქებთან, რომლებიც რუსეთის პრეზიდენთან დაახლოებული პირები არიან”- განაცხადა კეინმა.

დებატების განმავლობაში კეინი და პენსი რუსეთთან და პრეზიდენტ პუტინთან ურთიერთობების თემას არაერთხელ შეეხნენ.

დემოკრატების წარმომადგენელმა თავის ოპონენტს ტრამპის პუტინისადმი გამოთქმული კომპლიმენტებიც შეახსენა. განსაკუთრებით, ფრაზა: „პუტინი თავის ქვეყანაში უკეთესი ლიდერია, ვიდრე ობამა ამერიკის შეერთებულ შტატებში“.

კეინის თქმით, სავარაუდოდ, ტრამპს დიქტატურისა და ლიდერობის განსხვავება უჭირს.