პენტაგონი არ გამორიცხავს, რომ სირიაში განთავსებული რუსული C-300 B4-ის სამიზნე აშშ-ის ავიაციაა

მსოფლიო - 10:56, 05 Oct, 2016

3879

პენტაგონის პრესსპიკერის ტიმ ტუკის განცხადებით, რუსეთის მიერ სირიაში თანამედროვე საზენიტო-სარაკეტო კომლექსების C-300 B4-ის განთავსება არც „ისლამური სახელმწიფოს“ და არც „ალ-ნუსრას ფრონტის“ წინააღმდეგ არის მიმართული, რადგან დაჯგუფებებს ავიაცია არ ჰყავთ.

„მე მაინტერესებს, რა არის ამ სისტემების მიზანი?“ - განაცხადა პრესსპიკერმა პრესკონფერენციაზე.

კითხვაზე, წარმოადგენს თუ არა რაკეტები საფრთხეს აშშ-ის ავიაციისთვის, ტუკმა უპასუხა, რომ „ეს დამოკიდებულია იმაზე, როგორ გამოიყენებენ მას რუსები.“

შეგახსენებთ, გუშინ ცნობილი გახდა, რომ რუსეთმა სირიაში თანამედროვე საზენიტო-სარაკეტო კომლექსები C-300 B4 განათავსა. აღნიშნული ინფორმაცია რუსეთის საგარეო უწყებამ დაადასტურა.

ეს პირველი შემთხვევაა, როდესაც რუსეთი აღნიშნულ კომპლექსებს ქვეყნის საზღვრებს გარეთ ანთავსებს.

C-300 B4-ის ტიპის კომპლექსები ფრთოსანი რაკეტების, თვითმფრინავებისა და ბალისტიკური რაკეტების წინააღმდეგ საბრძოლველად არის განკუთვნილი. როგორც Fox News-თან ამერიკელი მაღალჩინოსანი აღნიშნავს, სირიაში მოქმედ ტერორისტულ დაჯგუფებებს საბრძოლო თვითმფრინავები არ ჰყავს.

გასული წლის ნოემბერში რუსეთმა სირიაში სამხედრო პოტენციალი გაზარდა და საზენიტო-სარაკეტო სისტემა C-400-ი განალაგა.