"თალიბანმა" ავღანეთის ჩრდილოეთით ქალაქ ქუნდუზზე შეტევა დაიწყო

მსოფლიო - 11:30, 03 Oct, 2016

2285

ბოევიკების მოძრაობა „თალიბანმა“ ავღანეთის ჩრდილოეთ ნაწილში ქუნდუზის პროვინციაზე შეტევა დაიწყო და ქალაქ ქუნდუზში შეიჭრნენ.

„ბიბისის“ ცნობით, ადგილობრივი პოლიციის განცხადებით, შეტევა ადგილობრივი დროით დაახლოებით შუაღამით დაიწყო. შეტაკებები ქალაქში ამ დრომდე გრძელდება.

როგორც “თალიბანის” წარმომადგენელი ზაბიჰულა მუჯაჰიდი თვითერის მიკრობლოგში წერს, ტერორისტებმა ქუნდუზში მასშტაბური ოპერაცია დაიწყო. ისლამისტების განცხადებით, შეტევა ქალაქზე ოთხი მხრიდან მიმდინარეობს.

„თალიბანი“ ასევე ქუნდუზის მახლობლად მდებარე დასახლება ნავაბადის დაკავების შესახებ იტყობინება, სადაც რამდენიმე სამხედრო მოკლეს და კონტროლი დაამყარეს ოთხ გამშვებ პუნქტზე.

როგორც სააგენტო Reueters-ის კორესპოდენტი იტყობინება, ქალაქ ქუნდუზის თავზე ვერტმფენები დაფრინავენ. მისივე თქმით, ქალაქში კალაშნიკოვის ავტომატებით, ტყვიამფრქვვებითა და ნაღმტყორცნებით შეიარაღებული მებრძოლები იმყოფებიან.

სააგენტო “ფრანს პრესის” ცნობით კი, ქალაქში დახურულია ყველა მაღაზია, ქუჩებში ადგილობრივები არ ჩანან.

“თალიბანმა” ქალაქი ქუნდუზი გასულ წელს დაიკავა, თუმცა სამთავრობო ძალებმა ქალაქზე კონტროლი 2 დღეში აღადგინეს.

ბრიუსელში, 4 ოქტომბერს ავღანეთის საკითხისადმი მიძღვნილი კონფერენცია იხსნება, რომელზეც ქაბულის დახმარების პროგრამა უნდა დაამტკიცონ.