68 წლის მოშე მირილაშვილს, რომელიც საქართველოდან აშშ-ში 1974 წელს გადასახლდა ნიუ-იორკის სასამართლომ 13 წელი მიუსაჯა. მირილაშვილს ბრალად ედებოდა ნარკოტიკების შემცველი ტკივილგამაყუჩებელი წამლების გასაღება. მას ასევე 2 მილიონი დოლარის გადახდაც მოუწევს ჯარიმის სახით, თუმცა მას ამ თანხის უდიდესი ნაწილი - დაახლოებით 1,7 მილიონი დოლარი ჩხრეკის დროს აღმოუჩინეს.

ნიუ-იორკის პროკურატურის ცნობით, 2012 წლის ოქტომბრიდან 2014 წლის დეკემბრამდე მოშიაშვილმა ოქსიდონტის 10 ათასზე მეტი დაუსაბუთებელი რეცეპტი გამოწერა, რაზეც პაციენტებისაგან 200 და 300 დოლარის ანაზღაურებას იღებდა. რეცეპტის გამოწერას თან არ ახლდა არანაირი სამედიცინო შემოწმება და დიაგნოზის დასმა.

"ის ფაქტიურად ნარკოდილერი იყო, რომელიც ექიმის ხალათით ინიღბებოდა," - აცხადებს სამხრეთ ნიუ-იორკის გენერალური პროკურორი.

მირილაშვილის შესახებ სამართალდამცავებს მისი ოფისის მეზობლებმა აცნობეს, რომელთაც შენიშნეს, რომ მასთან უჩვეულოდ ბევრი "პაციენტი" მიდიოდა.

მირილაშვილი ბრალს არ აღიარებს. მისი ადვოკატები სასამართლოსგან მხოლოდ 3 წლიან პატიმრობას მოითხოვდნენ, რადგან აცხადებდნენ, რომ ამგვარი რეცეპტების გამოწერა არა ნარკოდილერობის, არამედ მოშეს არაპროფესიონალიზმის ბრალი იყო.