რეის MH17-ის კატასტროფა - მოსკოვი გამოძიებას მიკერძოებულსა და პოლიტიკურ მოტივირებულს უწოდებს

მსოფლიო - 11:39, 29 Sep, 2016

1503

რუსეთის საგარეო საქმეთა სამინისტრო საერთაშორისო საგამოძიებო ჯგუფის მიერ უკრაინაში რეისს MH17-ის კატასტროფის გამოძიებას მიკერძოებულსა და პოლიტიკურ მოტივირებულს უწოდებს. შესაბამისი განცხადება საგარეო საქმეთა სამინისტროს ოფიციალურმა წარმომადგენელმა მარია ზახაროვამ გააკეთა.

“რუსეთი იმედგაცრუებულია, რომ „ბოინგის“ კატასტროფის ირგვლივ სიტუაცია არ იცვლება. ჰოლანდიური გმაოძიების შედეგები კი ცხადყოფს , რომ ეს მიკერძოებული და პოლიტიკურად მოტივირებულია. რუსეთმა თავიდანვე შესთავაზა გამოძიებას ერთობლივად მუშაობა მხოლოდ ფაქტებზე დაყრდნობით. ამის ნაცვლად, საერთაშორისო გამომძიებლებმა მოსკოვი საგამოძიებო პროცესს ჩამოაშორეს და ჩვენს ძალისხმევას მხოლოდ მეორეხარისხოვანი როლი მიანიჭეს. ბოროტ ხუმრობას ჰგავს, თუმცა უკრაინას მათ საგამოძიებო ჯგუფის სრულფასოვანი წევრის სტატუსი მიანიჭეს და ამით აჩუქეს შესაძლებლობა, გააყალბოს მტკიცებულებები და საქმე თავის სასარგებლოს აწარმოოს“ - განაცხადა ზახაროვამ.

გუშინ, საერთაშორისო საგამოძიებო ჯგუფი, რომელიც უკრაინაში “მალაიზიური ავიახაზების” კუთვნილი სამგაზვრო ლაინერის ბოინგ 777-ის კატასტროფის მიზეზებს იკვლევს, გამოძიების შედეგები გამოაქვეყნა და გარდაცვლილი მგზავრების ახლობლებს განუცხადა, რომ ლაინერი სოფელ სნეჟოენეს ტერიტორიიდან გაშვებულმა რაკეტამ ჩამოაგდო.

აღნიშნულ ტერიტორიას, ავიაკატასტროფის დროს პრორუსი შეიარაღებული ძალები აკონტროლებდნენ.

გამოძიების თანახმად რაკეტა უკრაინაში რუსეთიდან იქნა შეტანილი და იმავე ღამეს რუსეთში გადაიტანეს.

სოფელ სნეჟოენე, რომელიც დონეცკის თვითგამოცხადებულ რესპუბლიკაში მდებარეობს, ამჟამადაც პრორუსი სეპარატისტების კონტროლქვეშ იმყოფება.

საერთაშორისო საგამოძიებო ჯგუფის შემადგენლობაში შედიან ნიდერლანდების, ავსტრალიის, მალაიზიის, ბელგიისა და უკრაინის წარმომადგენლები. ჯგუფი გაეროს უშიშროების საბჭოს რეზოლუციის მანდატით მოქმედებს.

ჰააგაში საერთაშორისო ჯგუფი გამოძიების შუალედურ შედეგებს ცოტა ხანში გაასაჯაროებს.

შეგახსენებთ, ავიაკომპანია Malaysia Airlines-ის კუთვნილმა თვითმფრინავმა კატასტროფა 2014 წლის 17 ივლისს უკრაინის ტერიტორიაზე , დონეცკის ოლქში განიცადა, რის შედეგად 298 ადამიანი, მათ შორის 18 ბავშვი გარდაიცვალა.

დამოუკიდებელი ექსპერტების მიერ ჩატარებული კვლევების თანახმად, ლაინერი პრორუსული სეპარატისტების მიერ კონტროლირებადი ტერიტორიიდან ნასროლმა რაკეტამ ჩამოაგდო. ავიალაინერი “ბუკის” ტიპის საზენიტო-სარაკეტო კომპლექსიდან გაშვებული რაკეტის აფეთქების შედეგად განადგურდა.

რუსი ექსპერტის გამოძიების თანახმად, კი იმ დროისთვის უკრაინის შეიარაღებული ძალების მიერ კონტროლირებადი ტერიტორიიდან იყო ნასროლი.

გასულ წელს, ავსტრალიამ, ბელგიამ, მალაიზიამ, ბრიტანეთმა, ნიდერლანდებმა და უკრაინამ გაეროს უშიშროების საბჭოს საერთაშორისო ტრიბუნალის მოწვევის ინიციატივით მიმართეს, რათა ინციდენტთან დაკავშირებული ყველა პირი პასუხისგებაში მიეცეს, რასაც რუსეთმა ვეტო დაადო.