აზერბაიჯანის მოსახლეობის უმეტესობამ საკონსტიტუციო ცვლილებების პაკეტს მხარი დაუჭირა

აზერბაიჯანის მოსახლეობის უმეტესობამ საკონსტიტუციო ცვლილებების პაკეტს მხარი დაუჭირა - ეგზიტპოლი

მსოფლიო - 12:10, 27 Sep, 2016

2312

აზერბაიჯანის მოსახლეობის უმეტესობამ რეფერენდუმზე საკონსტიტუციო ცვლილებების პაკეტს, მათ შორის საპრეზიდენტო ვადის გაგრძელებას, მხარი დაუჭირა.

მონიტორინგის ცენტრის "რაის" ცნობით, გამოკითხულ მოქალაქეთა 92,5 %-მა მხარი დაუჭირა საპრეზიდენტო ვადის ხუთიდან შვიდ წლამდე გაზრდას, ხოლო ამომრჩეველთა 89,3%-მა ვიცეპრეზიდენტების ინსტიტუტის შემოღებას.

"რაის" ცნობით, რეფერენდუმში მონაწილეთა 91,1 პროცენტი თანახმაა, ქვეყნის პრეზიდენტობის კანდიდატისთვის ასაკობრივი ზღვარი გაუქმდეს.

კვლევას ამერიკული კომპანია Arthur J Finkelstein & Associates-იც ატარებდა, რომლის მონაცემებით, გამოკითხულთა 88,9 %-მა მხარი დაუჭირა რეფორმების პაკეტს. ანალოგიური მაჩვენებელი გამოაქვეყნა კვლევითმა ინსტიტუტმა OpinionWay-მა.

აზერბაიჯანში საკონსტიტუციო ცვლილებების განხორციელების ინიციატორი პრეზიდენტი ილჰამ ალიევია.

მანამდე, აზერბაიჯანის საკონსტიტუციო სასამართლომ დაამტკიცა საკონსტიტუციო ცვლილებები, რომელიც პრეზიდენტის უფლებამოსილების ვადის გაზრდას და პირველი ვიცე-პრეზიდენტის თანადებობის შემოღებას ითვალისწინებს.

გარდა ამისა, საკონსტიტუციო რეფორმის პროექტის თანახმად, გაუქმდება პრეზიდენტობის კანდიდატისთვის დაწესებული ასაკობრივი შეზღუდვა.

აზერბაიჯანის კონსტიტუციაში ცვლილებების შეტანების შესახებ რეფერენდუმის აქტი სულ 29 პუნქტისგან შედგება.