ავტობუსის მძღოლები დილაობით, სამედიცინო შემოწმებას გაივლიან

საზოგადოება - 21:55, 23 Sep, 2016

7170

ავტობუსის მძღოლები ყოველ დილით სამედიცინო შემოწმებას გაივლიან - ამის შესახებ თბილისის ტრანსპორტის საქალაქო სამსახურის ხელმძღვანელმა მამუკა მუმლაძემ ”პალიტრანიუსის” გადაცემა ”ჩემი კითხვის” ეთერში განაცხადა.

მუმლაძის თქმით, დედაქალაქში გახშირებულია ავტობუსების ავტოსაგზაო შემთხვევები.

”დედაქალაქში ასეთი მასშტაბის შემთხვევა ბოლო რამდენიმე წლის განმავლობაში არ ყოფილა. პირველი შემთხვევა, როცა ავტობუსი შევარდა სასტუმროში. მერიამ შესაბამისი ღონისძიებები გაატარა, დაზარალებულების მკურნალობა თავის თავზე აიღო. რაც შეეხება ავტობუსს, ის ტექნიკურად გამართული იყო. მიუხედავად იმისა, რომ ავტობუსები არის მოძველებული, ის ხაზზე ვერ გამოვა, თუ არ შემოწმდა. ტექნიკოსი ამოწმებს ავტობუსს და გადის მარშრუტზე. ავსტობუსი, რომელიც მზად არ არის მგზავრების მომსახურეობისთვის ჩერდება და შესაბამის პროცედურას გადის” - აცხადებს მუმლაძე.

მისი თქმით, მძღოლმა აუცილებელია წარმოადგინოს ჯანმრთელობის ცნობა, რადგან იყო შემთხვევა, როცა მძღოლს დაემართა ინფარქტი. მუმლაძის განცხადებით, მძღოლების სამედიცინო შემოწმების საკითხი მთავრობის სხდომაზე იქნა გადატნილი და დამტკიცდა, რომ მძღოლებს ექიმები შეამოწმებენ, ,,სამი ბაზა გვაქვს სულ და სამივეში გვეყოლება ექიმი, რომლებიც რეისში გასვლამდე ყველა მძღოლს შეამოწმებენ”, - აღნიშნა მუმლაძემ.

მუმლაძე არ გამორიცხავს, რომ თბილისის მერიამ მიკროავტობუსების მძღოლების კონტროლიცდაიწყოს.