აშშ და რუსეთი სირიაში ცეცხლის შეწყვეტის რეჟიმის აღდგენაზე ვერ შეთანხმდნენ

მსოფლიო - 10:35, 23 Sep, 2016

1814

აშშ და რუსეთი სირიაში ცეცხლის შეწყვეტის რეჟიმის აღდგენაზე ვერ შეთანხმდნენ.

“ჩვენ ვერ გამოვალთ და ვერ ვეტყვით მთელ მსოფლიოს, რომ შეთანხმებას მივაღწიეთ, თუ ეს ასე არ არის” - განაცხადა აშშ-ის სახელმწიფო მდივანმა, ჯონ კერიმ.

ნიუ-იორკში გამართულ შეხვედრაში ჯონ კერი, რუსეთის საგარეო საქმეთა მინისტრი სერგეი ლავროვი, ევროკავშირისა და ახლო აღმოსავლეთის ქვეყნების წარმომადგენლები მონაწილეობდნენ.

სირიის საკითხებში გაერო-ს სპეციალურმა წარმომადგენელმა სტეფან დე მისტურამ ნიუ იორკის მოლაპარაკებებს “ხანგრძლივი, მტკივნეული და იმედგაცრუების მომტანი” უწოდა. მისი თქმით, უახლოესი საათები და დღეები მშვიდობიანი პროცესისთვის კრიტიკულად მნიშვნელოვანია.

კერის განცხადებით, ნდობის აღსადგენად საჭიროა, რომ მათ, ვინც ჰაერში საბრძოლო მოქმედებებს განაგრძობს, შეწყვიტონ ამის კეთება. თავის მხრივ, ლავროვმა განცხადა, რომ საბრძოლო მოქმედებები ოპოზიციამ უნდა შეწყვიტოს.

შეხვედრა გაეროს გენერალური ასამბლეის ფარგლებში გაიმართა.

12 სექტემბრიდან გამოცხადებული ზავი რამდენიმე ინციდენტის შემდეგ დაირღვა.

ასადმა სამშვიდობო შეთანხების ჩაშლის შესახებ მას შემდეგ განაცხადა, რაც აშშ-ის ხელმძღვანელობით მოქმედმა კოალიციამ სირიის ჯარზე დარტყმები განახორციელა.

როგორც ვაშინგტონმა განაცხადა, ავიაერიშები „ისლამური სახელმწიფოს“ პოზიციებისკენ იყო მიმართული და არა სირიის სამთავრობო არმიაზე. მოგვიანებით ოპერაციაში მონაწილეობა დიდმა ბრიტანეთმა, დანიამ და ავსტრალიამ აღიარეს

ამის შემდეგ დაიბომა ქალაქ ალეპოს რამდენიმე რაიონი. მოგვიანებით კი სირიაში, ალეპოს მახლობლად ჰუმანიტარულ დახმარებით დატვირთული ავტოკოლონა დაბომბეს, რომელიც ამბოხებულების მიერ კონტროლირებად რაიონში მიემართებოდა.

ჰუმანიტარული ავტოკოლონა გაეროსა და "წითელი ნახევარმთვარის" სირიული განყოფილების მიერ იყო ორგანიზებული, გაერო-ს წარმომადგენლის ინფორმაციით, 31 სატვირთო მანქანიდან დაზიანებულია 18 მანქანა.

თეთრი სახლის განცხადებით კი, სირიის ქალაქ ალეპოსთან "წითელი ჯვრის" ჰუმანიტარულ ავტოკოლონაზე ავიაიერიშის დროს ჰაერში სუ-24 ტიპის ორი რუსული გამანადგურებელი დაფრინავდა.

სირიის საკითხებში გაერო-ს სპეციალური წარმომადგენელის თქმით, გაერო სირიაში ჰუმანიტარულ მისიას 26 სექტემბრიდან გაანახლებს.