მერაბ მეტრეველი: „იღებდა „ნაციონალური მოძრაობა“ და უჩვენებს „ქართული ოცნება“

საზოგადოება - 00:05, 08 May, 2013

2455

ამის შესახებ "პოზიციაში" ჟურნალისტმა მერაბ მეტრეველმა განაცხადა. მისი თქმით, თუნდაც ის ფაქტი, რომ წინა ხელისუფლების დროს სამხედრო პოლიცია დაკავებული იყო სატელიტური ანტენების ამოღებით, მიუთითებს იმაზე, რომ წინა ხელისუფლებამ მსგავსი სისტემა შექმნა და ამ სისტემაზე იდგა.

რაც შეეხება ციხის სკანდალურ კადრებს, მეტრეველის თქმით, "ტელევიზიებს ამ კადრების გავრცელებაზე რომ უარი ეთქვათ, დღეს ხელისუფლების სათავეში ისევ "ნაციონალური მოძრაობა" იქნებოდა, ახლა კი გამოდის, რომ იღებდა "ნაციონალური მოძრაობა" და უჩვენებს "ქართული ოცნება".

მერაბ მეტრეველი გაზეთ "ბათუმელების" მაგალითსაც შეეხო და განაცხადა, რომ წინა ხელისუფლების დროს იუსტიციის სამინისტროს მიერ დადებული გრიფი "საიდუმლო"პოლიციელების მხრიდან ჟურნალისტების დაშანტაჟების საქმეს დღემდე ადევს და პროკურორი აცხადებს, რომ საქმეს ამის გამო ვერ იძიებს.

მეტრეველის ამ რეპლიკას იუსტიციის მინისტრის მოადგილის პასუხი მოჰყვა:
"მერაბ, შენ ჟურნალისტი ხარ და კონკრეტული სამინისტროს მიმართ ბრალდება დასაბუთებული უნდა იყოს - იუსტიციის სამინისტრო საქმის მასალებს არ ასაიდუმლოებს", - მიმართა მას ალექსანდრე ბარამიძემ, რასაც მერაბ მეტრეველის პასუხი მოჰყვა: "არ ვიცი, გამოძიება მე არ ჩამიტარებია, მე ჩემი კოლეგების მიერ გამოქვეყნებული სტატიის დეტალებს გიყვებით".

მერაბ მეტრეველმა კიდევ ერთხელ გაუსვა ხაზი, რომ "ბათუმელების" შემთხვევის გამოძიება აუცილებლად უნდა წარიმართოს და სათანადო შედეგით დასრულდეს.

შეგახსენებთ, რომ გადაცემა "პოზიციაში" მედიაქსპერტმა ზვიად ქორიძემ განაცხადა გაზეთ "ბათუმელების" ბოლო ნომერში გამოქვეყნებული ინფორმაციის შესახებ, სადაც აღნიშნულია, რომ 2009 წელს გაზეთის ჟურნალისტების შანტაჟში შემჩნეული პირი არც წინა და არც ახალი ხელისუფლების პირობებში არ დაკითხულა და მეტიც - ის ცოტა ხნის წინ შსს-ს სისტემაში დააბრუნეს.