ბარაკ ობამას ბოლო სიტყვა გაეროს ასამბლეაზე აშშ-ის პრეზიდენტობის რანგში

მსოფლიო - 11:02, 21 Sep, 2016

1890

ბარაკ ობამამ აშშ-ის პრეზიდენტის რანგში გაეროს გენერალური ასამბლეის სესიაზე სიტყვით უკანასკნელად გამოვიდა .

"ამ დარბაზში პრეზიდენტის რანგში უკანასკნელად გამოვდივარ სიტყვით. ნება მიბოძეთ გავიხსენო ის პროგრესი, რომელსაც ბოლო რვა წლის განმავლობაში მივაღწიეთ. უმძიმესი ფინანსური კრიზისის დროს ჩვენ კატასტროფის თავიდან აცილება და გლობალური ეკონომიკის ზრდის აღდგენა შევძელით. წავართვით ტერორისტებს თავშესაფარი, მოვაგვარეთ ირანის ბირთვული საკითხი დიპლომატიის გზით. გავხსენით ურთიერთობები კუბასთან და დავეხმარეთ კოლუმბიას ამერიკის ყველაზე ხანგრძლივი ომის დასრულებაში. ამ ასამბლეაში ჩვენ მივესალმეთ მიანმარის დემოკრატიულად არჩეულ ლიდერს. ჩამოვაყალიბეთ გეგმა ჩვენი პლანეტის კლიმატური ცვლილებებისგან დასაცავად. ეს ძალიან მნიშნელოვანია. ეს ყველაფერი კი არ მოხდებოდა ჩვენი თანამშრომლობის გარეშე” - განაცხადა ბარაკ ობამამ.

ამას გარდა, აშშ-ის პრეზიდენტმა ჩამოთვალა საერთაშორისო საზოგადოების წინაშე დღეს არსებული გამოწვევები, მათ შორის ლტოლვილთა ნაკადი, ფინანსური პრობლემები და არასტაბილურობა ახლო აღმოსავლეთის რეგიონში. ობამამ მსოფლიო თანამეგობრობას წინსვლისკენ და დასავლური ღირებულებების დაცვისკენ მოუწოდა. მისი თქმით, აშშ-მა და სხვა განვითარებულმა სახელმწიფოებმა ახალაღმოცენებულ დემოკრატიებს უკეთესი მაგალითი უნდა მისცენ.

აშშ-ის პრეზიდენტმა ექსტრემიზმზეც ისაუბრა:

„ჩვენ ვხედავთ როგორ ზღუდავენ ჟურნალისტებს მთავრობები და როგორ ქმნიან ცენზურულ კანონებს. ტერორისტული ქსელები იყენებენ სოციალურ მედიას და ამით ახალგაზრდებს იზიდავენ, შედეგად კი ძალადობით გამოწვეული ბრაზი უცოდველი მიგრანტებისკენ და მუსლიმებისკენაა მიმართული. ძლიერი სახელმწიფოები კი საერთაშორისო სამართალს უგულებელყოფენ. ასეთ სამყაროში გვიწევს ცხოვრება. სოფლიო ზედმეტად პატარაა იმისთვის, რომ ააშენო კედელი და ამით თავიდან აიცილო ჩვენს საზოგადოებაზე გავლენა. მჯერა, რომ ღია ბაზრების და ანგარიშვალდებული მთავრობის, დემოკრატიის, ადამიანის უფლებებისა და საერთაშორისო სამართლის პრინციპები ამ საუკუნეში ადამიანური პროგრესის ყველაზე მტკიცე საფუძველია. მე ამ დასკვნას არა თეორიის ან იდეოლოგიის, არამედ ფაქტებზე დაყრდნობით ვაკეთებ” - განაცხადა ობამამ.

აშშ-ის პრეზიდენტმა სიტყვით გამოსვლისას რუსეთზეც ისაუბრა.

“მსოფლიოში, რომელშიც იმპერიების პერიოდი წარსულს ჩაბარდა, რუსეთი ცდილობს ძალის გამოყენებით დაკარგული დიდება აღადგინოს, მაგრამ თუ რუსეთი გააგრძელებს თავისი მეზობლების საქმეებში ჩარევას, მისი საკუთარი საზღვრები კიდევ უფრო დაუცველი გახდება" - განაცხადა აშშ-ის პრეზიდენტმა.

აშშ-ის ლიდერმა ასევე კატეგორიულად გამორიცხა სირიის კონფლიქტის სამხედრო გზით დარეგულირების შესაძლებლობა. მისი თქმით, სირიის ხუთწლიანი კრიზისის დასრულება მხოლოდ დიპლომატიური გზით არის შესაძლებელი.